ފަލަސްތީނާ ދެކޮޅަށް އިޒްރޭލުން ހިންގަމުންދާ ޖަރީމަތަކާ ހެދި ސިންގަޕޫރުން އިޒްލޭލާ ގުޅުން ކަނޑާލަން ގޮވާލައި ރެލީއެއް ބާއްވައި، އެކަމަށް ޑިމާންޑްކޮށް ބޮޑުވަޒީރު ލޯރެންސް ވޮންގް އަށް ސިޓީތަކެއް ހުށަހެޅުމާ ގުޅިގެން ފަލަސްތީނުގެ ހައްގުގައި އަޑު އުފުލާ ސިންގަޕޫރް ތިން އެކްޓިވިސްޓަކަށް ދައުވާކޮށްފި އެވެ.
އެ މީހުންނަށް ދައުވާކުރީ ރެލީއާ ގުޅިގެން ހައްޔަރުކޮށް ޖަލު ބަންދުގައި ބޭތިއްބުމަށް ފަހު، ކަފާލާތުގެ ދަށުން މިދިޔަ ބުރާސްފަތި ދުވަހު ދޫކޮށްލުމަށް ފަހު އެވެ.
މިދިޔަ ފެބްރުއަރީ މަހު ފަލަސްތީނަށް ތާއީދުކޮށް، އަދި އިޒްރާލާ ދެކޮޅަށް ހިނގާލުމެއް އިންތިޒާމު ކުރުމާ ގުޅިގެން ދައުވާކުރި ތިން މީހުންނަކީ އައްނަމަލާއި ކޮކީލާ ޕާރްވަތީ އާއި ސިތީ އަމީރާ މުހައްމަދު އަސްރޯރީގެ އިތުރުން މުސައްމަދު ސޮބިކޫން ނަހާރެވެ. އެ މީހުންގެ މައްޗަށް އުފުލާފައި ވަނީ ފުލުހުންގެ ހުއްދަ ހޯދުމަކާ ނުލައި ރެލީ އިންތިޒާކުރުމާއި އާންމު މަސްލަހަތު ނަގައިލަން މަސަައްކަތްކުރިކަމުގެ ދައުވާ އެވެ.
ހަތްދިހަ ވަރަކަށް މީހުން ބައިވެރިވި ރެލީގައި ފަލަސްތީނުގެ ދިދައިގެ ކުލަތައް ރަމްޒުކޮށްދޭ އަދި ކަރާ ސިފަކޮށް ކުޑަތަކެއް ބޭނުންކޮށް "ޖަސްޓިސް ނައު" ފަދަ އިބާރާތްތައް ލިޔެފައިވާ ޓީޝާޓް ބައެއް މީހުން ބޭނުންކޮށްފައިވެ އެވެ.
މި ރެލީއާ ގުޅިގެން ކުރި ދައުވާތައް ސާބިތުވެއްޖެ ނަމަ ހަ މަހަށް ޖަލަށް ނުވަތަ 10،000 ސިންގަޕޫރް ޑޮލަރު (7،300 ޑޮލަރު) ގެ ޖޫރިމަނާއެއް އަންނާނެ އެވެ.
ތިން އެކްޓިވިސްޓިން އިންތިޒާމުކުރި ރެލީގައި ވަނީ ބޮޑުވަޒީރަށް އެޑްރެސްކޮށްފައިވާ 140 ވަރަކަށް ސިޓީ ހިނގާލުމުގެ ތެރޭގައި ބޮޑުވަޒީރުގެ އޮފީސް ކައިރިން މަޑުޖައްސާލައި، ސިޓީތައް އޮފީހާ ވެސް ހަވާލުކޮށްފަ އެވެ. އާންމުންގެ އެ ސިޓީތަކުގައި ޑިމާންޑްކޮށްފައި އޮތީ ސިންގަޕޫރުން އިޒްރޭލާ އެކީ ބާއްވަމުންދާ ހުރިހާ ގުޅުމެއް ކަނޑާލުމަށެވެ.
އެކްޓިވިސްޓުންގެ މި ހަރަކާތާ ގުޅިގެން ސިންގަޕޫރްގެ ސަރުކާރުން ބުނީ އެ ގައުމަކީ މުޒާހަރާކޮށް، އާންމު މަސްލަހަތު ގެއްލި، ސުލްހަ މަސަލަސްކަން ގެއްލިދާނެ ފަދަ މަގުމަތީގެ ހަރަކާތްތަކަށް އެއްވެސް ވަރަކަށް ތަރުހީބު ދޭ ގައުމެއް ނޫން ކަމަށެވެ. އޭގެ ބަދަލުގައި ކަންކަން ހައްލު ކުރަން އިސްކުރަން ވާނީ މަޝްވަރާގެ އުސޫލު ކަމަށް ބުނެފައިވެ އެވެ.
މިކަމާ ގުޅިގެން ފުލުހުން ނެރުނު ބަޔާނެއްގައި ވަނީ ގާނޫނުތަކާއި ގަވައިދުތައް މުގުރައި ނުލުމަށާއި އާންމު މަސްލަހަތު ގެއްލިދާނެ ފަދަ އެއްވެސް ހަރަކާތެއް ނުހިންގަން އިލްތިމާސް ކުރާ ކަމަށެވެ.
ސިންގަޕޫރް ސަރުކާރުން ބުނީ ފަލަސްތީނުގެ ހައްގުގައި އަޑު އުފުލިޔަސް މަގުމަތީގެ ހަރަކާތްތައް ބާއްވައިގެން ނުވާނެ ކަމަށެވެ. އޭގެ ބަދަލުގައި އެފަދަ ކަންކަމާ ގުޅޭ ގޮތުން މަޝްވަރާ ކުރުމާއި ފަލަސްތީނަށް އެހީވާން ފަންޑް ހޯދުން ފަދަ ކަންކަން ކުރިއަށް ގެންދެވޭނެ ކަމަށް ބުންޏެވެ.
ތިން އެކްޓިވިސްޓުންނަށް ކުރި ދައުވާތަކާ ގުޅިގެން އޭގެ ތެރެއިން އައްނަމަލާއީ ނިސްބަތްވާ ޓްރާންސްފޮމޭޓިް ޖަސްޓިސް ކަލެކްޓިވް އިން އެކަން ކުށްވެރިކޮށް ދައުވާތައް އަނބުރާ ނަގަން ގޮވާލާފައިވެ އެވެ.
ދުނިޔޭގެ ވަރަށް ގިނަ ގައުމުތަކުން އަންނަނީ އިޒްރޭލުން ފަލަސްތީނާ ދެކޮޅަށް ހިންގަމުންދާ ގަތުލުއާންމާ ގުޅިގެން އިޒްރޭލާ ދެކޮޅަށް އެކިއެކި ހަރަކާތްތައް ހިންގަމުންނެވެ. އެގޮތުން ބައެއް ގައުމުތަކުން އިޒްރޭލުގެ ޕާސްޕޯޓް ވެސް މަނާކޮށްފައިވެ އެވެ. މިދިޔަ އަހަރުގެ އޮކްޓޯބަރު 7 އިން ފެށިގެން އިޒްރޭލުން ހިންގާ ޖަރީމާތަކުގައި ފަލަސްތީނު 40،000 އެއް މީހުން ޝަހީދުކޮށް، އެތައް މިލިއަން ބައެއްގެ ދިރިއުޅުން ހަލާކުކޮށް ސުންނާފަތިކޮށްފައިވެ އެވެ.