ޖަލުގައި ތިބޭ ކުށްވެރިންނަށް މަސްތުވާތަކެއްޗާއި ފޯނު ފަދަ ތަކެތި، ރިޝްވަތު ނައިގެން ފޯރުކޮށް ދެމުން ދިޔަ މައްސަލައިގައި ހައްޔަރުކުރި މޯލްޑިވްސް ކަރެކްޝަނަލް ސާބިސެސްގެ 13 އޮފިސަރުންގެ ތެރެއިން 11 އޮފިސަރަކު ޝަރީއަތް ނިމެންދަން ބަންދު ކުރަން އަމުރުކޮށްފި އެވެ.
އެ މީހުންގެ ބަދާ މެދު ގޮތެއް ނިންމަން ކްރިމިނަލް ކޯޓަށް ހާޒިރު ކުރުމުން ބާކީ ތިބި އަނެއް އޮފިސަރުންނަށް މުއްދަށް ދިނީ ފަސް ދުވަހެވެ.
ފުލުހުންގެ ޚާއްސަ އޮޕަރޭޝަނެއްގައި ހައްޔަރުކުރި އޮފިސަރުންގެ ތެރޭގައި ހިމެނެނީ ކ. މާފުށިން ހައްޔަރުކުރި ނުވަ އޮފިސަރަކާއި، ކާށިދޫން ހައްޔަރުކުރި ދެ އޮފިސަރަކާއި ހއ. އުތީމުން ހައްޔަރުކުރި އޮފިސަރެއްގެ އިތުރުން އޮފިސަރަކާއި މާލެއިން ހައްޔަރުކުރި އޮފިސަރެކެވެ.
ފުލުހުން ބުނެފައިވާ ގޮތުގައި މި މައްސަލައި ޖުމްލަ 18 މީހަކު ޝާމިލުވާ އިރު، އެ އޮފިސަރުންގެ އެކައުންޓަށް މިދިޔަ އަހަރު އެކަނި ވެސް 73.3 މިލިއަން ރުފިޔާ ޖަމާކޮށްފައިވެ އެވެ. އެގޮތުން އެކެއްގެ އޮފިސަރެއްގެ އެކައުންޓަށް އަހަރެއް ތެރޭގައި 24 މިލިއަން ރުފިޔާ ޖަމާކޮށްފައިވާ ކަމަށް ވެސް ފުލުހުން ބުރާސްފަތި ދުވަހުގެ ރޭ ބޭއްވި ނޫސްވެރިންގެ ބައްދަލުވުމެއްގައި ބުނެފައިވެ އެވެ.
އެ ފައިސާ އޮފިސަރުންގެ އެކައުންޓަށް ޖަމާކޮށްފައި ހުރީ ޖަލުގައި ހުކުމް ތަންފީޒުކުރަމުން އަންނަ މީހުންނާއި ޖަލުގައި ހުކުމް ތަންފީޒުކޮށްފައިވާ މީހުންނާއި، ކުށުގެ ވެށީގައި އުޅޭ މީހުންގެ ފަރާތުން ކަމަށް ފުލުހުން ބުންޏެވެ.
މިކަމާ ގުޅިގެން ހޯމް މިނިސްޓަރު އަލީ އިހުސާން ވިދާޅުވީ އޮފިސަރުންގެ އެކައުންޓުތަކަށް މިލިއަނުން ފައިސާ ވަން އިރު، އެ މައުލޫމާތު މިހާތަނަށް ނުލިބި ފެއިލްވި ގޮތް ވެސް ތަހުގީގު ކުރާނެ ކަމަށެވެ.