އައްޑޫ މަސްވެރިން މިހާރު ކުރަމުން އަންނަ މުޒާހަރާއާ ގުޅިގެން މަރަދޫ މަސްވެރިންނާ އެކީ އެ އަވަށު ރައްޔިތުން ތިބިކަން ހާމަކޮށް ދޭން މިހާރު ސިލްސިލާކޮށް ކުރިއަށް ގެންދާ އިހުތިޖާޖުގައި އިއްޔެ މަރަދޫގައި ފިޝަރީޒް މިނިސްޓަރު އަހުމަދު ޝިޔާމާއި ރައީސް ޑރ. މުހައްމަދު މުއިއްޒުގެ އިސްތިއުފާ އަށް ގޮވައިފި އެވެ.
މަސްވެރިންގެ އާއިލާތަކާއި އެ މީހުންގެ ގާތް މީހުން އިއްޔެ ހަވީރު މަރަދޫ ބަނދަރު މަތީގައި ބޭއްވި އެއްވުމުގައި މަސްވެރިންގެ އާއިލާތަކަށް ނިސްބަތްވާ އެކި މީހުން ވާހަކަ ދައްކާފައިވެ އެވެ. އެގޮތުން މަސްވެރިންނަށް ދޭން ޖެހޭ ފައިސާ ނުދީ އެ މީހުންގެ އާއިލާތައް ހާލުގައި ޖައްސައި ބިކަކޮށްފައިވާ ކަމަށް ބުނެ ސަރުކާރަށް ވަރަށް ބޮޑަށް ފާޑު ކިޔާފައިވެ އެވެ.
މަސްވެރިންގެ އާއިލާތަކުން ބުނީ މި ސަރުކާރަކީ މަސްވެރިންނަށް ވައުދުތަކެއްވެގެން އައި ސަރުކާރެއް ނެތް ނަމަވެސް، އެ ވައުދުތައް ނުފުއްދައި ސަރުކާރުގެ އަނިޔާވެރިކަން މިހާރު އިންތިހާ އަށް ގޮސްފައިވާ ކަމަށެވެ.
އެހެންވެ ދެން އެންމެ ރަނގަޅު ވާނީ ފިޝަރީޒް މިނިސްޓަރު ޝިޔާމާއި ރައީސް މުއިއްޒު އިސްތިއުފާ ދެއްވުން ކަމަށް ބުނެފައިވެ އެވެ. އެ މީހުން ބުނީ މަސްވެރިންނަށް ލާރި ނުދޭ ނަމަ، މުޒާހަރާ ކުރަން މާލެ އަރަން ވެސް ތައްޔަރަށް ތިބި ކަމަށެވެ.
އައްޑޫ މަސްވެރިންނަށް ފައިސާ ނުލިބިގެން ހުޅުމީދޫގައި ހުންނަ މިފްކޯގެ ފިޝަރީޒް ކޮމްޕްލެކްސްގައި މުޒާހަރާ ކުރަމުން އަންނަތާ އިއްޔެ އަށް ވަނީ ހަފުތާއެއްވެފަ އެވެ.
އެ މީހުން ބުނަމުން އަންނަނީ ފައިސާ ނުލިބެނީސް މުޒާހަރާ ހުއްޓާ ނުލާނެ ކަމަށެވެ. އައްޑޫގައި އެންމެ ފުޅާކޮށް މަސްވެރިކަން ކުރާ، މަރަދޫ މަސްވެރިން ބުނާ ގޮތުން ފާއިތުވި ދެހަމާއި 17 ދުވަހަށް ލިބެން ޖެހޭ ފައިސާގެ އަދަދު 8.3 މިލިއަނަށް އަރަ އެވެ.