އިންޑިއާގެ ބަތަލާ އަދި ކުރީގެ މިސް ޔުނިވާސް ސުޝްމިތާ ސެންގެ އުފަން ދުވަހަށް އާ ތާރީހެއް ކަނޑައަޅައިފި އެވެ.
އެގޮތުން ދެވަނަ އުފަން ތާރީހެއްގެ ގޮތުގައި 48 އަހަރުގެ ބަތަލާ އިންސްޓަގްރާމްގައި ހިމަނާގައި ވަނީ ފެބްރުރީ 27، 2023 އެވެ. އެ ތާރީހަކީ އޭނަ އަށް މިދިޔަ އަހަރު ހާޓްއެޓޭކެއް ޖެހުނު ދުވަހެވެ. އޭރު ސުޝްމިތާ އަށް ހާޓްއެޓޭކެއް ޖެހުނީ ކުޅެމުން ދިޔަ ވެބް ސީރީޒް "އާރިއާ" ގެ ތިން ވަނަ ސީޒަންގެ މަސައްކަތުގައި އުޅެނިކޮށެވެ.
ހާޓްއެޓޭކްގެ ވާހަކަ އޭނަ ބައްޕައާ އެކީ ނަގާފައިވާ ފޮޓޯއަކާ އެކީ އިންސްޓަގްރާމްގައި ހިއްސާކުރީ ފަރުވާ ހޯދަމުން، ހާލަތު ވަރަށް ބޮޑަށް ރަނގަޅުވުމުން މާޗް 2 ގަ އެވެ.
ސުޝްމިތާ ދެވަނަ އުފަން ތާރީހެއް ކަނޑައެޅީ ހާޓްއެޓޭކުން ސަލާމަތްވެ، އަލުން ހަޔާތާއިގެން ކުރިއަށް ދާން ލިބުނު ފުރުސަތުގެ ސަބަބުންނެވެ. އެހެންވެ އެކަން އޭނަ ސިފަކުރަނީ ދެވަނަ އުފަންވުމެއްގެ ގޮތުގަ އެވެ. ސުޝްމިތާގެ އަސްލު އުފަން ތާރީހަކީ ނޮވެމްބަރު 19، 1975 އެވެ.
އޭނަ އަށް މިސް ޔުނިވާސްގެ ތާޖު ލިބުނީ 1994 ގަ އެވެ. ސުޝްމިތާ އަކީ ބޮލީވުޑަށް ނުކުތް ނަމަވެސް މާ ބޮޑު ކުރިއެރުމެއް ލިބުނު ބަތަލާއެއް ނޫނެވެ.