އުންމީދަކީ އައްޑޫ ޝަންގްރިއްލާ ވިލިގިނލި ރިސޯޓް އެންޑް ސްޕާ ވަރަށް އަވަހަށް ހުޅުވުން ކަމަށާއި އޭގެ ސަބަބުން އައްޑޫގެ އިގުތިސާދަށް ހެޔޮ ބަދަލުތަކެއް އަންނާނެ ކަމަށް ޓޫރިޒަމް މިނިސްޓަރު އިބްރާހީމް ފައިސަލް ވިދާޅުވެއްޖެ އެވެ.
އެ ރިސޯޓް ބަންދުކުރީ ކޮވިޑް-19 ގެ ބަލިމަޑުކަމާ ގުޅިގެން 2020 ގެ މެދުތެރޭގަ އެވެ.
ޝަންގްރިއްލާ ރިސޯޓަކީ ކުރިން ސަރުކާރުގެ 30 ޕަސެންޓް ހިއްސާ އާއި އައްޑޫ އިންވެސްޓްމެންޓް ޕްރައިވެޓް ލިމިޓެޑްގެ 70 ޕަސެންޓް ހިއްސާއާ އެކީ 2008 ގައި ހުޅުވި ރިސޯޓެކެވެ. ސަރުކާރުން މިދިޔަ އަހަރުގެ އޮގަސްޓު މަހުގެ ތެރޭގައި ވަނީ އެ ރިސޯޓުގައި އޮތް ސަރުކާރުގެ 30 ޕަސެންޓް ހިއްސާ ދޫކޮށްލައިފަ އެވެ.
މި ރިސޯޓާ ބެހޭ ގޮތުން މިދިޔަ ބުރާސްފަތި ދުވަހު ފައިސަލް ވިދާޅުވީ ކައިރި މުސްތަގުބަލެއްގައި އެ ރިސޯޓް ހުޅުވާނެ ކަމަށެވެ.
"ޝަންގްރިއްލާ އޮޕަރޭޝަނަށް ގެނައުމަކީ އަޅުގަނޑުމެންގެ ވަރަށް ބޮޑު އަމާޒެއް، ވަރަށް ބޮޑު އުއްމީދެއް މިއީ، އެކަން ހާސިލްކުރުމަށް މި ދަނީ ކުރެވެން ހުރި ހުރިހާ މަސައްކަތެއް ކުރަމުން،" އޭނަ ވިދާޅުވި އެވެ. "ވަރަށް ކައިރި މުސްތަގުބަލެއްގައި ޝަންގްރިއްލާގެ އިޝޫއަށް ވެސް ހައްލެއް ލިބި އައްޑޫގެ ޒުވާނުންނަށް ހަތަރު ސަތޭކައެއްހާ ވަޒީފާ ހުޅުވިގެންދާނެ."
މިނިސްޓަރު ވިދާޅުވީ އައްޑޫގައި އެނދު އިތުރުވުމަކީ ބޭރުގެ އެއާލައިންތައް ވެސް އިތުރުވާން މަގުފަހިވާނެ ކަމެއް ކަމަށާއި އޭރުން އައްޑޫގެ ޓޫރިޒަމް ކާމިޔާބު ވާނެ ކަމަށް ވިދާޅުވި އެވެ. އޭނަ ވިދާޅުވީ ޗައިނާ އިން ގަމަށް ޑައިރެކްޓު ފްލައިޓްތައް ގެންނަން ރައީސް ޑރ. ހައްމަދު މުއިއްޒުގެ ވައުދާ އެއްގޮތަށް އައްޑޫގެ ޓޫރިޒަމް ކުރިއަރުވާނެ ކަމަށެވެ/
މި ސަރުކާރުން އައްޑޫގައި އައްސޭރި ޓޫރިޒަމް ޕްރޮޖެކްޓެއް ހިންގަން ހަމަޖެހިފައިވާ އިރު، އިންޓަގްރޭޓެޑް ޓޫރިޒަމަށް ހަންކެޑެ ތަރައްގީ ކުރުމުގެ މަޝްރޫއު އެޕްރީލް މަހުގެ ތެރޭގައި އިފުތިތާހުކޮށްފައިވެ އެވެ. އެ މަޝްރޫއު ހަވާލުކޮށްފައި ވަނީ ޗައިނާގެ ޗައިނާ ނޭޝަނަލް އިލެކްޓްރިކަލް އިންޖިނިއަރިން (ސީއެންއީސީސީ( އާ އެވެ.
މި ޕްރޮޖެކްޓްގައި ޖުމްލަ 1،041 ކޮޓަރި ހިމެނެ އެވެ. އަދި އެއީ ބެޑް ކެޕޭސިޓީ އަށް ބަލާ އިރު، 2،080 އެނދެވެ.
އައްޑޫގައި މިހާރު ރިސޯޓްތަކަކީ ކެނަރީފާއި ސައުތު ޕާމްގެ އިތުރުން ގަމުގެ އީކްއެޓަ ވިލެޖެވެ. އައްޑޫގައި ގިނަ އަދަދެއްގެ ގެސްޓްހައުސް ވެސް ހިންގަ އެވެ.