މިދިޔަ ބުރާސްފަތި ދުވަހު ރިލީޒްކުރި އިންޑިއާގެ ސައިންސް ފިކްޝަން ތެލެގޫ ފިލްމު "ކަލްކީ: 2898 އޭޑީ" އަށް ބޮކްސް އޮފީހިހައި ބޮޑު ތަރުހީބެއް ލިބެމުން އެބަދެ އެވެ.
އިންޑިއާގައި ވާހަކަ ދައްކައި އުޅޭ ހުރިހާ ބަހުރުވައަކުން މި ފިލްމު ސިނަމާތަކަށް ގެނެސް، އިންޑިއާ އިން ބޭރުގެ މާކެޓްތަކުގައި ވެސް އަންނަނީ ވަރަށް ރަނގަޅު ވިޔަފާރިއެއް ކުރަމުންނެވެ. އެގޮތުން "ކަލްކީ" ރިލީޒްކުރިތާ ދެ ދުވަހުގެ ތެރޭގައި އިންޑިއާ އާއި ބޭރުގެ މާކެޓްތަކުން ލިބުނު އާމްދަނީ މިހާރު ވަނީ 250 ކްރޯޑް ރުޕީސް (30 މިލިއަން ޑޮލަރު) އަށް އަރައިފަ އެވެ.
މި ފިލްމުގެ ހިންދީ ވާޝަނަށް އެކަނި ވެސް އިންޑިއާ އިން އިއްޔެއާ ހަމައަށް 45.74 ކްރޯޑް ރުޕީސް (5.5 މިލިއަން ޑޮލަރު) ލިބިފައިވެ އެވެ.
ކުޅަދާނަ ތެލެގޫ ޑައިރެކްޓަރު ނާގް އަޝްވިން ލިޔެ، ޑައިރެކްޓްކުރި "ކަލްކީ" އަކީ އިންޑިއާގެ އެންމެ އަގު ބޮޑު އެއް ފިލްމެވެ. މި ފިލްމު ހަދާފައި ވަނީ 600 ކްރޯޑް ރުޕީސް (72 މިލިއަން ޑޮލަރު) ގެ ބަޖެޓުންނެވެ.
ބޮކްސް އޮފީހުގައި ފިލްމު ހޯދަމުން އަންނަ ކާމިޔާބީ އަށް ބަލާ އިރު، އިންޑިއާގެ ބޮކްސް އޮފީހުގެ އިތުރުން އެ ގައުމުގެ ފިިލްމުތައް އިންޑިއާ އިން ބޭރުފަ ބޮައި ހަދާގައިވާ ރެކޯޑްތައް ވެސް "ކަލްކީ" މުގުރައިލާނެކަނުގެ ކުލަވަރު ވަރަށް ބޮޑު ފިލްމީ ޚަބަރުތައް ދިރާސާކުރާ ފަރާތްތަކުން ބުނެ އެވެ.
"ބާހްބަލީ" ކުޅެގެން ބޮޑު މަޝްހޫރު ކަމެއް ހޯދި ތެލެގޫ އެކްޓަރު ޕްރަބާސް ބަތަލުގެ ރޯލު ކުޅެފައިވާ ފިލްމުގެ ކާސްޓްގައި ދީޕިކާ ޕަދްކޯން، އަމީތާބް ބައްޗަން، ކަމަލް ހަސަން އަދި ޑިޝާ ޕަޓާނީ ހިމެނެ އެވެ.
"ކަލްކީ" ގެ ވާހަކަ އާއި ތަރިންގެ އެކްޓިން އާއި ޑައިރެކްޝަނާއި ޖުމްލަކޮށް މުޅި ފިލްމަށް ކްރިޓިކުން ވެސް ވަރަށް ބޮޑަށް ތައުރީކޮށްފައިވެ އެވެ. އެގޮތުން މިއީ ވަރުގަދަ ފިލްމުތައް ހޮލީވުޑްގެ މާވެލް ސްޓޫޑިއޯސްގެ ފިލްމުތަކަށް ދޫނުކުރާ ވަރުގެ ފިލްމެއް ކަމަށް ވަރަށް ގިނަ ކްރިޓިކުން ފާހަގަކޮށްފައިވެ އެވެ.
އެގޮތުން "ކަލްކީ" ވީއެފްކްސް ދާއިރާ އިން އިންޑިއާގެ ވަރުގަދަކަން ސާބިތުކޮށް ދިން ފިލްމަށާއި މިއީ އިންޑިއާ ފަހުރުވެރިވުން ހައްގު ފިލްމެއް ކަމަށް ބުނެފައިވެ އެވެ. މިއަށް ވަރަަށް ގިނަ ކްރިޓިކުން ފަސް ތަރިން ހަތަރު ތަރީގެ ރޭޓިންއެއް ވެސް ދީފައިވެ އެެވެ.