މި ސަރުކާރުގެ ސިޔާސީ މަގާމުތައް މިހާރު 2،000 އަށް ވުރެ ގިނަ ކަމަށާއި އެ މީހުންގެ މުސާރަ އަށް 700 މިލިއަން ރުފިޔާ ކޮންމެ މަހަކު ހޭދަކުރަމުން އަންނަ ކަމަށް ކުރީގެ މަހަކު ފިނޭންސް މިނިސްޓަރު އިބްރާހީމް އަމީރު މިއަދު ވިދާޅުވެއްޖެ އެވެ.
ރާއްޖޭގެ މިހާރުގެ އިގުތިސާދީ ހާލަތާ މެދު ހުރި ކަންބޮޑުވުންތަކާ ގުޅޭ ގޮތުން އެމްޑީޕީން ބޭއްވި ނޫސްވެރިންގެ ބައްދަލުވުމެއްގައި އަމީރު ވިދާޅުވީ މި ސަރުކާރުގެ ނާގާބިލުކަމުގެ ސަބަބުން މާލީ ހާލަތު ގޯސްވެފައިވާ ކަމަށެވެ. ނަމަވެސް އެކަން ފޮރުވަން ޑރ. މުހައްމަދު މުއިއްޒުގެ ސަރުކާރުން ހަގީގަތާ ޚިލާފު ވާހަކަ ދައްކަމުން އަންނަ ކަމަށެވެ.
އަމީރު ވިދާޅުވީ މި ސަރުކާރުން ސަރުކާރު ހިއްސާވާ ކުންފުނިތަކުގެ މުސާރަ އާއި ޚަރަދު ވެސް އިތުރުކޮށްފައިވާ ކަމަށާއި އެގޮތުން ދައުރު ބަދަލުވި އިރު ކުންފުނިތަކުގެ ޕޭރޯލް ހުރި މިންވަރާ އަޅައިބަލާއިރު މުސާރައިގެ ޚަރަދު މިހާރު މަދުވެގެން 15 ޕަަސެންޓް މައްޗަށް އަރާފައިވާ ކަމަށ ވިދާޅުވިއެވެ.
އެމްޑީޕީން މިއަދު އާންމުކުރި ތަފާސްހިސާބުތަކެއް:
* 2023 ނިމުނު އިރު ފެނަކަގައި 74 މިލިއަން ރުފިޔާ، މިހާރު 84 މިލިއަން ރުފިޔާ
* 2023 ނިމުނު އިރު އެމްޓީސީސީގައި 60 މިލިއަން ރުފިޔާ، މިހާރު 65 މިލިއަން ރުފިޔާ
* 2023 ނިމުނު އިރު އާރުޑީސީގައި 22 މިލިއަން ރުފިޔާ، މިހާރު 28 މިލިއަން ރުފިޔާ
* 2023 ނިމުނި އިރު ވެމްކޯގައި 21 މިލިއަން ރުފިޔާ، މިހާރު 31 މިލިއަން ރުފިޔާ
* 2023 ނިމުނު އިރު ސްޓެލްކޯގައި 40 މިލިއަން ރުފިޔާ، މިހާރު 44 މިލިއަން ރުފިޔާ
ސަރުކާރުން މިހާރު ހަރަދުތައް ކުޑަކުރަން އަންނަނީ ފިޔަވަޅުތަކެއް އަޅަމުންނެވެ. އަދ ސިޔާސީ މަގާމުތަކުގައި ތިބި މުވައްޒަފުންގެ އަދަދު ވެސް މަދުކުރަން ވަނީ ފަށައިފަ އެވެ. މި ސަރުކާރު ވެރިކަމަށް އައި އިރު ބުނެފައި ވަނީ ސިޔާސީ މަގާމުތައް 700 އަށް ވުރެ އިތުރު ނުވާނެ ކަމަށެވެ.
ނަމަވެސް ސިޔާސީ މަގާމުތައް އިންތިހާ އަށް އިތުރުވެ، ގިނަ ބައެއްގެ ފާޑުކިޔުންތައް އަމާޒުވެފައިވެ އެވެ. އަދި ސިޔާސީ މަގާމުތަކުގައި މިހާރު ތިބި އަދަދެއް ވެސް ސަރުކާރުން ސާފުކޮށެއް ނުދެ އެވެ