ގަވައިދާ ހިލާފަށް އުޅެމުންދިޔަ 50 ބިދޭސީއެއް އިމިގްރޭޝަންގެ ބެލުމުގެ ދަށަށް ގެންގޮސްފިއެވެ.
އިމިގްރޭޝަން އަދި ފުލުހުން ގުޅިގެން އަންނަނީ ގަވައިދާ ހިލާފަށް އުޅޭ ބިދޭސީން ހޯދުމުގެ އޮޕަރޭޝަނެއް ކުރިއަށް ގެންދަމުންނެވެ.
އެގޮތުން މި އޮޕަރޭޝަންގައި ގަވައިދާ ހިލާފަށް އުޅެމުން ދިޔަ 50 ބިދޭސީއެއް އިއްޔެ އިމިގްރޭޝަނާ ހަވާލު ކޮށްފައިވާ ކަމަށް ފުލުހުން މައުލޫމާތު ދީފައިވެއެވެ.
މާލޭގައި އިއްޔެ ކުރިއަށްގެންދިޔަ އޮޕަރޭޝަން ކުރިއަށް ގެންގޮސްފައިވަނީ ލޯކަލް މާރުކޭޓާއި މާލެތެރޭގައި ހިންގާ ބައެއް މާރުކޭޓްތަކުގެ އިތުރުން އެކި ސަރަހައްދުތަކުގައި ކަމަށް ފުލުހުން ބުނެފައިވެއެވެ.
މި އޮޕަރޭޝަނާއި ގުޅޭގޮތުން އިމިގްރޭޝަންގެ ކޮންޓްރޯލާ ޖެނެރަލް މުހައްމަދު ޝައްމާން ވަހީދް ވިދާޅުވެފައިވަނީ، އިމިގްރޭޝަންގެ ބެލުމުގެ ދަށަށް ގެނެވިފައިވާ ފަރާތްތަކުގެ ތެރޭގައި ސައްހަ ހުއްދައެއް ނެތި އަދި ހުއްދަ ދޫކުރެވިފައިވާ މަސައްކަތުގެ ބޭރުން އަމިއްލައަށް ވިޔަފާރި ކުރާ ފަރާތްތަކެއް ދެނެގަނެވިފައިވާ ކަމަށެވެ.
"އަދި އުސޫލުގެ ތެރެއިން މި ފަރާތްތައް ރާއްޖެއިން ޑީޕޯރޓްކޮށް ފޮނުވާލެވޭނެ." ޝައްމާން ވިދާޅުވިއެވެ.
މީގެއިތުރުން އޭނާ ވިދާޅުވީ ރާއްޖޭގައި ޤަވާއިދާ ޚިލާފް އުޅޭ ބިދޭސީންގެ މައްސަލަ ހައްލު ކުރުމަކީ ރައީސް ޑރ. މުހައްމަދު މުއިއްޒުގެ ވައުދުފުޅަކަށް ވާއިރު، މި މަސައްކަތުގައި އިމިގްރޭޝަންގެ ފުރިހަމަ ޒިންމާ އަދާކުރަމުން ދާނެކަމުގެ ޔަގީންކަން އަރުވާ ކަމަށެވެ.