ރާއްޖޭގައި ދިރިއުޅޭ ބިދޭސީންގެ މަޢުލޫމާތު އެއްކުރުމަށް ކުރިއަށް ގެންދާ "ކުރަނގި" އޮޕަރޭޝަން ކ. މާފުށީގައި ނިންމައިލި އިރު، އެ ރަށުން 1،076 ބިދޭސީންގެ މަޢުލޫމާތު ނަގާފައިވާ ކަމަށް ހޯމްލޭންޑް މިނިސްޓްރީން ބުނެފި އެވެ.
އެ ރަށުގައި މި ޕްރޮގްރާމް ފެށީ މި މަހުގެ 13 ގަ އެވެ. އަދި އީދު ބަންދަށް މެދުކަނޑާލުމަށް ފަހު އަލުން މި ހަފުތާގެ ކިރީކޮޅު މަހުގެ އޮޕަރޭޝަން ފަށައި ނިންމައިލީ އިއްޔެ އެވެ. މާފުއްޓަކީ "ކުރަނގި" އޮޕަރޭޝަން ހިންގި ދެވަނަ ރަށެވެ.
މި އޮޕަރޭޝަން މެއި މަހުގެ 2 ގައި އެންމެ ފުރަތަމަ ފެށީ ކ. ހިންމަފުށީފަ އެވެ. އެގޮތުން އެ ރަށުގައި ދިރިއުޅޭ 705 ބިދޭސީންގެ ބައޮމެޓްރިކް ޑޭޓާ ނަގާފައިވެ އެވެ.
"ކުރަނގި" އޮޕަރޭޝަންގެ އަމާޒަކީ ރާއްޖޭގައި ދިރިއުޅޭ ހުރިހާ ބިދޭސީންގެ މަޢުލޫމާތު އަހަރު ދުވަހުގެ ތެރޭގައި އެއްކުރުމެވެ.
ރާއްޖޭގެ ދިރިއުޅޭ ހުރިހާ ބިދޭސީންގެ މަޢުލޫމާތު ހިމެނޭ ޑޭޓާބޭސްއެއް ޤާއިމުކުރުމަކީ ދާޚިލީ ސަލާމަތާ ފަންނިއްޔަތާ ބެހޭ ވުޒާރާއިން، ބިދޭސީންނާ ގުޅޭ މައްސަލަތައް ޙައްލުކުރުމަށްޓަކާ ފައްޓާފައިވާ އެންމެ ބޮޑު މަސައްކަތެކެވެ. އެގޮތުން ހުރިހާ ދާއިރާތަކެއްގައި މަސައްކަތްކުރާ ބިދޭސީންގެ މަޢުލޫމާތު މީގެ ތެރެއިން އެއްކުރާނެ އެވެ.
މީގެ އެންމެ ބޮޑު ބޭނުމަކަށްވަނީ ރާއްޖޭގައި އުޅޭ ބިދޭސީން ދިރިއުޅޭ ތަންތަނާ އެމީހުން ރާއްޖޭގައި ކުރަމުން އަންނަ މަސައްކަތްތައް ދެނެގަތުމެވެ.