އެތައް ފިލްމަކާއި ޓީވީ އުފެއްދުންތަކެއްގައި މަސަައްކަތްކޮށްފައިވާ އެމެރިކާގެ އެކްޓަރު ޖޯޝް ލޫކަސް އަލުން އެންގޭޖްވެއްޖެ އެވެ.
ދަރިޔަކު ވެސް ލިބިފައި ވަނިކޮށް އަލަތު ކައިވެނި ރޫޅިފައިވާ 53 އަހަރުގެ އެކްޓަރުގެ އާ ބައިވެރިޔަކީ އޭބީސީ7 ގައި މޫސުމާ ބެހޭ މައުލޫމާތު ގެނެސްދޭ މީޓިރިއޮލޮޖިސްޓް ބްރައާނާ ރަފަލޯ އެވެ. ލޫކަސް އާއި ބްރިއާނާ އެންގޭޖްވި ވާހަކަ އިންސްޓަގްރާމްގައި ވެސް ހިއްސާކޮށްފައިވެ އެވެ. އަދި ވަރަށް ގިނަ ފޭނުން އަންނަނީ މަރުހަބާ ވެސް ކިޔަމުންނެވެ.
ލޫކަސް އާއި ޖެސިކާ ސީޝީން ހެންރިގްއޭޒް 2012 ގައި ކުރި ކައިވެނި ރޫޅުނީ 2014 ގަ އެވެ. އެ ދެ މީހުންނަށް ލިބިފައިވާ ދަރިފުޅަކީ މިހާރު 12 އަހަރުގެ ނޯއާ ރެވް މޯރާ އެވެ.
ލޫކަސް އާއި ބްރިއާނާ އެންގޭޖްވި އިރު، އެ ދެ މީހުން ރައްޓެހިވީ 2022 ގަ އެވެ.
ކާމިޔާބު އަދި ހުނަރުވެރި އެކްޓަރުގެ ފާހަގަކޮށްލެވޭ ބައެއް ފިލްމުތަކުގެ ތެރޭގައި "އެމެރިކަން ސައިކޯ"، "ބިއުޓިފުލް މައިންޑް"، "ސްވީޓް ހޯމް އަލަބަމާ" އަދި "ފޯޑް ވާސަސް ފެރާރީ" ފަދަ އެތައް ފިލްމެއް ހިމެނެ އެވެ. ލޫކަސްގެ އެންމެ ފަހުގެ ފިލްމަކީ މިދިޔަ އަހަރުގެ "ބްލަޑް ފޯ ޑަސްޓް" އެވެ. އޭނަގެ ކުރިއަށް އޮތް ފިލްމަކީ "ކްއީން އޮފް ދަ ރިންގް" އެވެ.
އޭނަގެ ޓީވީ އުފެއްދުންތަކުގެ ތެރެއިން މި ފަހުން އެންމެ މަގުބޫލުވި އެއްޗަކީ "ޔެލޯސްޓޯން" އެވެ.