ފުލުހުންގެ އިތުރު ތިން ކޮމާންޑެއް އުފައްދައިފި އެވެ.
ފުލުހުންގެ ތަރުޖަމާނުގެ އަދި އެސިސްޓަންޓް ޕޮލިސް ކޮމިޝަނަރު އަހުމަދު ޝިފާން ވިދާޅުވީ ފުލުހުންގެ ތެރެއަށް ގެނައި ބަދަލަކީ ކުރިއަށް އޮތް ހަތަރު އަހަރަށް އެކުލަވައިލި ސްޓްރެޖެޓިކް ޕްލޭނާ އެއްގޮތަށް ފުލުހުންގެ މުއައްސަސާ ރީސްޓްރަޗްކާ ކުރުމުގެ ގޮތުން ގެނައި ބަދަލުތަކެއް ކަމަށެވެ.
އޭނަ ވިދާޅުވީ މާދަމާއިން ފެށިގެން ފުލުހުންގެ މުއައްސަސާ ހިންގާނީ އަލަށް އިތުރު ތިން ކޮމާންޑަކާ އެކީ ކަމަށެވެ. އެއާ އެކީ ކޮމާންޑްތަކުގެ އަދަދު 17 ކޮމާންޑަށް އަރާނެ އެވެ. އަލަށް އުފެއްދި ކޮމާންޑުތަކަކީ ގޭންގް ކްރައިމް އެންފޯސްމެންޓާއި ޑިޖިޓަލް ޑޭޓާ އެންޑް ޓެކްނޮލޮޖީއާއި ހުޅުމާލެ ޕޮލިސް އެވެ.
ޑިޖިޓަލް ޑޭޓާ ކޮމާންޑުގެ ވެރިއަކަށް ހަމަޖައްސާފައި ވަނީ ކުރިން އައްޑޫ ކޮމާންޑަރަކަށް ހުރި އަހުމަދު އާތިފު އެވެ. ޑިޖިޓަލް ޑޭޓާ ކޮމާންޑަކީ ޒަމާނީ ފެންވަރުގައި މައުލޫމާތު އެއްކޮށް އޭގެ މައްޗަށް ބިނާކޮށް ފުލުހުންގެ މުއައްސަސާ ހިންގުމުގެ މަގުސަދުގައި އުފެއްދި ކޮމާންޑެކެވެ.
ފުލުހުންގެ ކްރިމިނަލް އިންވެސްޓިގޭޝަންގެ ހެޑަކަށް މިހާރު މަޖައްސާފައި ވަނީ މާލެ އޭރިޔާގެ ކޮމާންޑަރަކަށް ކުރިން ހުންނެވި އެސިސްޓެންޓް ކޮމިޝަނާ އޮފް ޕޮލިސް އަބްދުﷲ ޝަރީފެވެ.
ފުލުހުންގެ ހިންގުމަށް ދެން ގެނައި ބަދަލުތަކާ އެސިސްޓެންޓް ކޮމިޝަނަރެއްގެ މަގާމުގައި ހުންނެވި ޔޫނުސް ސޮބާހު މިހާރު ވަނީ އޮޕަރޭޝަނަލް ސަޕޯޓުގެ ޑެޕިއުޓީއަކަށް ބަދަލުކޮށްފަ އެވެ.
އަލަށް އުފެއްދި ގޭންގު ކްރައިމް އެންފޯސްމެންޓުގެ ވެރިޔަކީ މުހައްމަދު އާރިފް އެވެ.