އައްޑޫ ސިޓީގެ ގަން އިންޓަނެޝަނަލް އެއާޕޯޓް ތަރައްގީ ކުރަން ބޭނުންވާ ފައިސާ ހޯދާފައިވާ ކަމަށާއި އެއާޕޯޓްގެ މަސައްކަތް ވަރަށް ބާރަށް ކުރިއަށްދާ ކަމަށް ރައީސް އަބްދުﷲ ޔާމީން ރޭ ވިދާޅުވެއްޖެ އެވެ.
"އައްޑު އަތޮޅުގެ އެއާޕޯޓް މިހާރު ބައިނަލްއަގްވާމީ އެއާޕޯޓަކަށް ވެގެން އެ ތަނަށް ބޭނުންވާ ހުރިހާ އިންފްރާސްޓްރަކްޗައަކަށް އިންވެސްޓް ކުރެވިގެން އެ ދަނީ. އެކަމަށް ފައިސާ ހޯދިއްޖެ،" ރައީސް ވިދާޅުވި އެވެ.
"އިރާދަކުރެއްވިއްޔާ އެ ތަނަށް ދާދި އަވަހަށް ބޮޑެތި ބޯޓްފަހަރުތައް ޖެއްސުމުގެ ފުރުސަތު ތަނަވަސްވެގެން ދާނެ."
އިސްމެހެލަ ހެރަ ރިސޯޓެއްގެ ގޮތުގައި ތަރައްގީ ކުރުން އިފުތިތާހު ކުރުމަށް ބޭއްވި ރަސްމިއްޔާތުގައި ރައީސް ވިދާޅުވީ "ފުރިހަމަ" އިންޓަނެޝަނަލް އެއާޕޯޓެއްގެ ގޮތުގައި ގަން އެއާޕޯޓް ވަރަށް އަވަހަށް ހުޅުވާނެ ކަމަށެވެ. ގަން އެއާޕޯޓަަށް ބޭނުންވާ ފައިސާ ހޯދިއްޖެ ކަމަށް ރައީސް ރޭ ވިދާޅުވިޔަސް، އެކަމާ ބެހޭ އިތުރު ތަފުސީލެއް ނުދެއްވަ އެވެ.
ގަން އެއާޕޯޓް ތަރައްގީ ކުރަން ހިންގާ މަޝްރޫއުގެ ތެރެއިން މިހާރު ކުރިއަށް ދަނީ އެ ތަނުގެ ރަންވޭ ބޮޑު ކުރުމުގެ މަސައްކަތެކެވެ. އެ މަސައްކަތް ހަވާލުކޮށްފައި ވަނީ ޑެންމާކްގެ ހޯގާޑާ އެވެ.