މުހައްމަދު ޖަމީލް ޖަލުގައި ނިޔާވެފައި އޮއްވާ ފެނުނު މައްސަލާގައި ޝައްކުއުފެދޭ ކަންކަން ހުރުމުން އެ މައްސަލަ ތަހުގީގު ކޮށްދިނުން އެދި ދަ ޑިމޮކްރެޓްސްއިން ހިއުމަން ރައިޓްސް ކޮމިޝަން އޮފް މޯލްޑިވްސްއަށް މައްސަލަ ހުށަހަޅައިފިއެވެ.
ޑިމޮކްރެޓްސްގެ ރައީސް ހަސަން ލަތީފް ސޮއިކޮށް އެޗްއާރްސީއެމްއަށް ފޮނުވި ސިޓީއެއްގައި ބުނެފައިވަނީ، ޖަލުގައި ނިޔާވެފައި އޮއްވާ ފެނުނު ޖަމީލުގެ ހަށިގަނޑުގައި ނޫފައިގަނެފައިވާ ތަންތަނާއި އަނިޔާގެ ނިޝާންތައް ކަމަށް ބެލެވޭ ގިނަ ތަންތަން ހުރުމާއި ޖަމީލް ނިޔާވީ ޖަލު ބަލަހައްޓާ ކަރެކްޝަންސްގެ އޮފިސަރުން އަނިޔާކޮށް ފަރުވާ ދިނުމުގައި އިހުމާލުވުމުގެ ސަބަބުން ކަމަށް ގިނަ ބަޔަކު ކަންބޮޑުވުން ފާޅުކުރަމުންދާ ކަމަށެވެ.
މި މަރުގައި ޝައްކުއުފެދޭ ކިތަންމެކަމެއް ހުރުމާއެކު މި މަރުގެ މައްސަލައިގައި އެއްވެސް ފަރާތެއްގެ އިހުމާލެއް ވޭތޯއާއި ޖަލު ބަލަހައްޓާ އޮފިސަރުންގެ ފަރާތުން އަނިޔާކޮށްފައިވޭތާއާއި ބޭސްފަރުވާ ހިމެނޭހެން ޤާނޫނުތަކާއި ގަވައިދުތަކުން ކަށަވަރު ކޮށްދޭ އެންމެހައި ހައްގުތައް ބަންދުކޮށްފައި ހުރި މުއްދަތުގައި ޖަމީލަށް ފުރިހަމައަށް ލިބިފައިވޭތޯ ބަލާ ތަހުގީގުކޮށްދިނުމަށް ޑިމޮކްރެޓްސްއިން ވަނީ އެދިފައެވެ.
ޝަރީއަތް ނިމެންދެން މާފުށީ ޖަލުގައި ބަންދުކޮށްފައި ހުއްޓާ، ށ. ފުނަދޫ، މުހައްމަދު ޖަމީލު، ނިޔާވީ ހުކުރު ދުވަހުއެވެ. އޭނައަށް އަނިޔާކުރިކަމުގެ ތުހުމަތުތަކެއް ކޮށްފައިވާއިރު ފުލުހުން ބުނެފައިވަނީ އޭނަގެ ހަށިގަނޑުގައި ނިޝާންތަކެއް ހުއްޓަސް އެއީ އަނިޔާގެ ނިޝާންތަކެއް ނޫން ކަމަށެވެ.