ބޮލީވުޑްގެ ކުރީގެ މަޝްހޫރު އެކްޓަރު ޝަތުރުގަން ސިންހާ ހޮސްޕިޓަލްގައި އެޑްމިޓްކޮށް ފަރުވާ ދެމުން އަންނަ ކަމަށް އާއިލާ އިން ބުނެފި އެވެ.
މީޑިއާތަކުން ބުނީ ސަތަރޭ އެޑްމިޓްކުރީ މި މަހުގެ 23 ވަނަ ދުވަހު އަންހެން ދަރިފުޅު ސޮނާކްޝީ ސިންހާ ކައިވެނި ކުރިތާ ދެ ދުވަސް ފަހުން ކަމަށެވެ. އެ ކައިވެނީގެ ހަފުލާގައި ސަތަރޭ ވަރަށް ހަރަކާތްތެރިކޮށް އުޅުނެވެ.
އޭނަ ބަލިވެގެން އެޑްމިޓްކޮށް ފަރުވާ ދެމުން އަންނަ މުމްބާއީގެ ކޮކޯލާބެން ދިރުބާއީ އަމްބާނީ ހޮސްޕިޓަލްގަ އެވެ.
މިކަމާ ބެހޭ ގޮތުން ސަތަރޭ، 77، ގެ އެއްމާބަނޑު ދެ ފިރިހެން ކުދިންގެ ތެރޭގައި ހިމެނޭ އެކްޓަރު ލަވް ސިންހާ، އިންޑިއަން އެކްސްޕްރެސް އަށް ބުނީ ބައްޕަ އެޑްމިޓްކުރީ ވައިރަލް ހުމެއްގެ ސަބަބުން ކަމަށެވެ. އެހެންވެ ސަތަރޭގެ ސިއްހަތާ މެދު ކަންބޮޑުވާން ޖެހޭ ވަރުގެ ކަމެއް ނެތް ކަމަށާއި ހާލު ރަނގަޅު ކަމަށް ބުންޏެެވެ.
"އާއިލާ އިން ބޭނުން ވެސް ވެގެން ބައްޕަ އެޑްމިޓްކުރީ." އޭނަ ބުންޏެވެ.
އިންޑިއާގެ ގާނޫނު ހަދާ މަޖިލީހުުގެ ތިރިގެ، ލޯކް ސަބާގެ މެންބަރެއްގެ ގޮތުގައި ވެސް ހުރި ސަތަރޭ އަކީ 70 އާއި 80 ގެ އަހަރުތަކުގެ ތެރޭގައި ވަރަށް ކާމިޔާބު ފިލްމުތަކެއް ކުޅެފައިވާ އެކްޓަރެކެވެ. ކުރިން މިނިސްޓަރުކަން ވެސް ކޮށްފައިވާ ސަތަރޭ އަކީ މިހާރު ވެސް މަދުމަދުން ފިލްމުތަކުން ފެންނަ އެކްޓަރެކެވެ.
އެގޮތުން އޭނަ އެންމެ ފަހުން ފެނިފައި ވަނީ ދަރުމެންދުރާ އާއި އޭނަގެ ދެ ފިރިހެން ދަރިން ކަމަށްވާ ސަނީ އާއި ބޮބީ ޑިއޯލް އެކީގައި ކުޅުނު 2018 ގެ "ޔަމްލާ ޕަގްލާ ދީވާނާ ޕިރު ސޭ" އިންނެވެ.
މި އަހަރުގެ ކުރީކޮޅު ސަތަރޭ ވަނީ "ގޭންގްސް އޮފް ގަޒީއާބާދު" ގެ ވެބް ސީރީޒެއްގެ މަސައްކަތް ވެސް ނިންމައިފަ އެވެ.