ކުށަށް އަރައިގަތުމުގެ ނުރައްކަލުގައިވާ ކުދިންނަށް ބޭނުންވާ ފަރުވާ ފޯރުކޮށް ދިނުމަށާއި އިޞްލާޙީ އަދި ރިހެބިލިޓޭޝަން ޕްރޮގްރާމްތައް ހިންގުމަށް ހަދަން ނިންމާފައިވާ "ހޯމް އައިލޭންޑް' ގެ މަސައްކަތް ކުރިއަށް ގެންދަން ސަރުކާރުން ނިންމައިފި އެވެ.
ރައީސް ޑރ. މުހައްމަދު މުއިއްޒު އެގޮތަށް ނިންމެވީ އިއްޔެ ބޭއްވި ކެބިނެޓް ބައްދަލުވުމުގައި ހޯމްލޭންޑް މިނިސްޓްރީން ހުށަހެޅި ކަރުދާހަކަށް ކެބިނެޓްގައި މަޝްވަރާ ކުރުމަށް ފަހު އެވެ.
އެކަރުދާހުގައި ހުށަހަޅާފައިވާ ގޮތަށް ކުށަށް އަރައިގަތުމުގެ ނުރައްކަލުގައި ތިބޭ ކުދިންނާއި އެކި ސަބަބުތަކަށްޓަކައި ކުށަށް އަރައިގަންނަން މެދުވެރިވާ ކުޑަކުދިންނަށް ބޭނުންވާ ފަރުވާއާ އެހީތެރިކަން ފޯރުކޮށް ދިނުމަށްޓަކައި ކުޑަކުދިންގެ ޢަދުލުގެ ޤާނޫނުގެ ދަށުން ބަޔާންކުރާ "ލޯންގް ޓާމް ރެސިޑެންޝަލް ކެއާ ފެސިލިޓީ" މީހުން ދިރިނޫޅޭ ވަކި ރަށެއްގައި ގާއިމުކުރުމަށް ނިންމަވާފައިވެ އެވެ.
މީގެ އިތުރުން އެފަދަ މަރުކަޒެއްގައި ހުންނާނެ ފެސިލިޓީތަކާއި މަރުކަޒުގައި ހިންގާނެ ޕްރޮގްރާމުތަކުގެ ތަފުސީލުތައް ވެސް ކަރުދާހުގައި ހިމަނާފައިވެ އެވެ.
"ހޯޕް އައިލޭންޑް" އާ ބެހޭ ގޮތުން ހޯމްލޭންޑް މިނިސްޓަރު އަލީ އިހުސާން ވިދާޅުވެފައި ވަނީ އެ ރަށަށް ގެންދާ ކުދިންނަށް ރަނގަޅު ވަޒީފާތަކާއި ފައިނޭންޝަލް ސިސްޓަމްގައި ކުދިންނަށް ލިބެން ޖެހޭ ފަރުވާ ދިނުމުން ދާއިމީ ހައްލެއް ވެސް ލިބިގެން ދާނެ ކަމަށެވެ. އަދި އެތަނުގައި އިސްލާހުކުރާ ކުދިން 18 އަހަރު ވަންދެން އެތަނުގައި އުޅޭނެ އެވެ. އެއަށް ފަހު ފުލުހުން ނުވަތަ ދިވެހި ސަފައިންގެ ޚިދުމަތުން ކުރެ ތަނެއްގައި ވަކި މުއްދަތެއް ވަންދެން އެ ކުދިން ޚިދުމަތް ކުރަންޖެހޭނެ ކަމަށް މިނިސްޓަރު ވިދާޅުވި އެވެ.
އަދި އޭގެ ފަހު އެ ކުދިން ބޭނުންވާ ދާއިރާއަކުން ކުރިއަށް ދިއުމަށް ފުރުޞަތު ވެސް ދެވޭނެ ކަމަށް މިނިސްޓަރު ވިދާޅުވި އެވެ.