ގަވާއިދާ ޚިލާފަށް އުޅޭ ބިދޭސީން ބަލައި ފާސްކުރުމަށް އިމިގްރޭޝަނުން ކުރިއަށްގެން ދިޔަ އޮޕަރޭޝަނުގައި މިހާތަނަށް ޤަވާއިދާ 83 ބިދޭސީއަކު އެތަނުގެ ބެލުމުގެ ދަށަށް ގެންގޮސްފިއެ ވެ.
އިމިގްރޭޝަނުން ނެރުނު ބަޔާނެއްގައި ބުނީ މިއީ މިއަހަރުގެ މިހާތަނަށް އެ އިދާރާއިން ފުލުހުންނާ ގުޅިގެން ކުރިއަށް ގެންދިޔަ އެންމެ ބޮޑު ރެއިޑް އޮޕަރޭޝަން ކަމަށެވެ.
ކޮންޓްރޯލަ ޖެނެރަލް އޮފް އިމިގްރޭޝަން، މުޙައްމަދު ޝަމްޢާން ވަޙީދުގެ އިރުޝާދާ އެއްގޮތަށް ކުރިއަށް ގެންދިޔަ އޮޕަރޭޝަނުގައި މާލެ ސަރަހައްދުގައި މާރުކޭޓުގެ ގޮތުގައި ހިންގަމުން އަންނަ 4 ތަނެއް ބަލައި ފާސްކޮށްފައިވެ އެވެ. އިމިގްރޭޝަންގެ ބެލުމުގެ ދަށަށް ގެންދިޔަ އެންމެންނަކީ ވެސް އެތަންތަނުން އަތުލައިގަތް މީހުންނެވެ.
އޭ ތެރޭގައި، ސައްޙަ ވިސާއެއް ނެތް ބިދޭސީންނާއި މަސައްކަތް ކުރުމަށް ހުއްދަ ހޯދާފައިވާ ތަން ނޫން އެހެން ތަނެއްގައި މަސައްކަތް ކުރަމުން ދިޔަ ބިދޭސީންނާއި ހުއްދަ ދޫކުރެވިފައިވާ މަސައްކަތުގެ ބޭރުން އަމިއްލަ އަށް ވިޔަފާރި ކުރާ ބިދޭސީން ހިމެނޭ ކަމަށް ވެސް އިމިގްރޭޝަނުން ބުންޏެވެ.
މި ރެއިޑް އޮޕަރޭޝަނުގައި އިމިގްރޭޝަނުގެ ބެލުމުގެދަށަށް ގެންދިޔަ ބިދޭސީން ފުރުވާލުމުގެ މަސައްކަތް ކަމާގުޅުން ހުރި އިދާރާތަކާ ގުޅިގެން ފަށާފައިވާ ކަމަށް ވެސް އިމިގްރޭޝަނުން ބުންޏެވެ އެގޮތުން ގަވާއިދާ ޚިލާފަށް އުޅޭ، 1،800 އަށްވުރެ ގިނަ ބިދޭސީން މިހާތަނަށް ފުރުވާލާފައިވާ ކަމަށް އެތަނުން ބުނެފައިވެ އެވެ.
ރާއްޖޭގައި ގަވާއިދާ ޚިލާފަށް އުޅޭ ބިދޭސީންގެ މައްސަލައަށް އަވަސް ހައްލެއް ހޯދުމުގެ ގޮތުން ހުރިހާ ބިދޭސީންނާ ބެހޭ މައުލޫމާތު އެއްކުރަން މިހާރު އަންނަނީ "ކުރަނގި" ގެ ނަމުގައި އޮޕަރޭޝަނެއް ހިންގަމުންނެވެ. ހޯމްލޭންޑް މިނިސްޓްރީން ކުރިއަށް ގެންދާ މި އޮޕަރޭޝަން މިހާރު ދެ ރަށެއްގައި ވަނީ ހިންގައިފަ އެވެ. އެއީ ކ. ހިންމަފުއްޓާއި މާފުށީފަ އެވެ.
ސަރުކާރުގެ އަމާޒަކީ އަހަރުގެ ދުވަހުގެ ތެރޭގައި ހުރިހާ ބިދޭސީންގެ މައުލޫމާތު އެއްކުރުމެވެ.