އަންނަ މަހު އޮލިމްޕަހަށް ގެންނަން ނިންމާފައިވާ ލޯބީގެ ބިރުވެރި ފިލްމު "ސާޔާ" ގެ އާ ޕޯސްޓަރުތަކެއް ދައްކާލައިފި އެވެ.
މި ފަހަރު ދައްކާލާފައި ވަނީ ފިލްމުގެ ލީޑް ތިން ތަރިންގެ ވަކިވަކި ޕޯސްޓަރުތަކެކެވެ. އޭގެ ތެރޭގައި ފިލްމު ލިޔެ، ޑައިރެކްޓްކޮށް މުހިއްމު ރޯލެއް ކުޅުނު ޔޫސުފް ޝަފީއު (ޔޫއްޕެ) އާއި އައިމިނަތު ރަޝްފާ (އާޝާ) އަދި އިބްރާހީމް ޖިހާދު (ޖިމީ) ގެ ޕޯސްޓަރެއް ހިމެނެ އެވެ.
ފިލްމު އަންނަ މަހުގެ 7 ގައި އޮލިމްޕަހަށް ގެންނަން ނިންމިކަން މިދިޔަ ހަފުތާގައި އިއުލާންކުރީ ތިން ތަރިން އެކީގައި ފެންނަ ޕޯސްޓަރަކުންނެވެ.
"ސާޔާ" އަކީ ޔޫއްޕެ ޕްރޮޑަކްޝަނާއި ޕްރޮޑިއުސަރު އިސްމާއީލް ޝަފީގުގެ ޝައި ޕްރޮޑަކްޝަން ގުޅިގެން ގެނެސްދޭ ފިލްމެކެވެ. އަދި މި ފިލްމަކީ މި އަހަރު އޮލިމްޕަހަށް އަންނަ ދެވަނަ ބިރުވެރި ފިލްމެވެ. މި އަހަރު އެޅުވި ފުރަތަމަ ބިރުވެރި ފިލްމަކީ ޑައިރެކްޓަރު އިލްޔާސް ވަހީދު (އިއްލެ) ގެ އައި ފިލްމްސް އިން ފެބްރުއަރީ 1 ގައި ޕްރީމިއާ ކުރި "ކަންބަޅި" އެވެ.
"ސާޔާ" އަންނަ މަހުގެ 7 ގައި ޕްރީމިއާކުރަން ތާވަލުކޮށްފައި އިރު، އަންނަ މަހުގެ 27 ގައި ޑައިރެކްޓަރު ހުސައިން މުނައްވަރުގެ "ކަމަނާ" އޮލިމްޕަށް އަންނާނެ އެވެ.
އޮލިމްޕަހުގައި އެންމެ ފަހުން ދެއްކީ މުހައްމަދު ނިޔާޒު (ޓެޑްރީ) ގެ "ލަސްވިޔަސް" އެވެ. މިއީ މި އަހަރު އެޅުވި 5 ވަނަ ފިލްމެވެ.