ރާއްޖެ އަށް އެތެރެކޮށް ވިއްކާ ސައިކަލާއި ކާރާއި އެނަޖީ ޑްރިންކްސް، ޑިއުޓީ އިނާޔަތް ދިނުން އިސްތިސްނާވާ ތަކެތީގެ ތެރޭގައި ހިމަނައިފި އެވެ.
ދަތުރުވެރިން ގެންނަ ތަކެއްޗާއި އަމިއްލަ ފަރާތްތަކުގެ ކުދިކުދި ބޭނުންތަކަށް ގެންނަ ތަކެއްޗާއި ވިޔަފާރި ސާމްޕަލް ގޮތުގައި ގެންނަ ތަކެތިން ޑިއުޓީ މަޢާފުކުރުމުގެ އުސޫލަށް އިއްޔެ އިން ފެށިގެން އަމަލުކުރަން ފަށާފައިވާ ކަމަށް ކަސްޓަމްސްއިން ބުންޏެވެ. އެގޮތުން އަމިއްލަ ފަރާތްތަކުގެ ކުދި ކުދި ބޭނުންތަކަށް ރާއްޖެއިން ބޭރުން ގެންނަ ތަކެތިން ޑިއުޓީ މައާފުކުރުމަށް ކަސްޓަމްސް އިން ކަނޑައަޅާފައިވާ މިންވަރަކީ، އެފްއޯބީގެ އަގުން 10،000ރ. ގެ ތަކެއްޗެވެ.
ކަސްޓަމްސްގެ އުސޫލުގެ ދަށުން މުދަލުގެ އަގު 10،000ރ. އަށް ވުރެ ބޮޑު ނަމަ ގުޑްސް ޑިކަލޭރަޝަންސް ހުށަހަޅަން ޖެހޭނެ އެވެ.
އަދި މުދަލުގެ އަގު 10،000ރ. އަށް ވުރެ ކުޑަވިޔަސް އެތަކެތީގެ ބާވަތާއި އަދަދާއި އަގާއި ގެންނަ ނިސްބަތަށް ބަލާއިރު، އެއީ އަމިއްލަ ކުދި ކުދި ބޭނުންތަކަށް ދޫކުރެވޭ ވަރަށްވުރެ ގިނަ ތަކެތި ކަމަށްވާ ނަމަ ގުޑްސް ޑިކަލޭރަޝަންސް ހުށަހަޅައި ޑިއުޓީ ދެއްކުމަށް އެ އުސޫލުގައި ވެއެެވެ.
ޑިއުޓީ އިނާޔަތް ދިނުން އިސްތިސްނާވާ ތަކެތި:
* މޮޓޯ ސައިކަލް އަދި އޮޓޯ ސައިކަލް
* ކަނޑުގައި ދުއްވާ އުޅަނދުފަހަރު
* ހަތަރު ފުރޮޅުލީ އުޅަނދުފަހަރު
* އެއްގަމާއި ކަނޑުގެ އުޅަނދުފަހަރުގެ ސްޕެއާ ޕާޓްސް
* ސިންގަލް ޔޫސް ޕްލާސްޓިކްސް
* އެނަޖީ ޑްރިންކްސް
ކަސްޓަމްސް އިން ބުނި ގޮތުގައި މި ތަކެއްޗަކީ ރާއްޖޭގެ އެކްސްޕޯޓާއި އިމްޕޯޓް ގާނޫނުގެ ދަށުން، އިއްޔެ އިން ފެށިގެން ޑިއުޓީ އިނާޔަތް ދިނުމުން އިސްތިސްނާވާ ތަކެތި ކަމަށެވެ.
އާ އުސޫލުގެ ދަށުން ދުންފަތް އެކުލެވޭ ބާވަތްތަކާއި އެ ތަކެތި ބުއިމަށް ބޭނުންކުރާ އާލަތްތަކަށް ވެސް ޑިއުޓީ އިނާޔަތް ދިނުން އަންނަ މަހުން ފެށިގެން އިސްތިސްނާ ވާނެ އެވެ.