ސިއްރު އިންސްޓަގްރާމް އެކައުންޓެއް ގެންގުޅޭ ކަމަށާއި އެކަމަކު މިއީ އެހާ ގަޔާވާ ކަމެއް ނޫން ކަމަށް ބޮލީވުޑްގެ ތަރި ސައިފް އަލީ ޚާން ބުނެފި އެވެ.
އޭނަ އަކީ އިންޑިއާގެ ހުރިހާ ފިލްމީ ތަރިންނެއްހެން އިންސްޓަގްރާމާއި އެ ނޫން ވެސް ސޯޝަލް މީޑިއާގެ އެކައުންޓްތައް ގެންގުޅޭ އިރު، އެ ތަރިންނާ ހިލާފަށް ސޯޝަލް މީޑިއާ އަބަދު ވެސް ވަރަށް ދުރު މީހެކެވެ. އެހެންވެ އެއްވެސް ޕްލެޓްފޯމެއްގައި ސައިފްގެ ރަސްމީ އެއްވެސް އެކައުންޓެއް ނެތެވެ.
މިކަމާ ބެހޭ ގޮތުން މީޑިއާއަކާ ވާހަކަ ދައްކަމުން 53 އަހަރުގެ އެކްޓަރު ބުނީ ސޯޝަލް މީޑިއާ އަކީ އެހާ ކަމުދާ އެއްޗެއް ނޫން ކަމަށެވެ.
"އަހަރެން އެހާ ގަޔާވާ އެއްޗެއް ނޫން އެއީ. ދޭތެރެއަކުން އެކައުންޓަށް ވަދެ ވެސް ލަން. އަދި ހިތަށް ރާ އެ އެއްކޮށް ޑިލީޓްކޮށްލާނަމޭ ވެސް،" ސައިފް ބުންޏެވެ. "އެކަމަޖު އެކަން އެކަން އަދި ނުވެ އޮތީ."
އޭނަ ބުނީ ސޯޝަލް މިޑިއާ އަކީ އޭގެ ސަބަބުން ފައިދާތަކެއް ވާ އެއްޗެއް ކަމަށް ގަބޫލުކުރާ ކަމަށެވެ. އެކަމަކު އެ ބޭނުން ކުރާ މީހުން އެ އެއަށް ދެވި ހިފައި އެ މީހެއްގެ ދިރިއުޅުމުގައި ހިނގާ ހުރިހާ ކަމެއް ސޯޝަލް މީޑިއާގައި ޕޯސްޓްކުރުމަކީ ރަނގަޅު ކަމެއް ނޫން ކަމަށް ބުންޏެވެ.
"އަސްލު ބުނެވިދާނެ އަހަރެން ސޯޝަލް މިޑިއާ ދުރުގައި އުޅޭތީ ވަރަށް ހަމަޖެހިލައިގެންނޭ މި އުޅެނީ. ފޭނުންގެ ފްރެޝަރަށްޓަކައި ފިކުރު ބޮޑުވާކަށް ނުޖެހޭ،" ސައިފް ބުންޏެވެ. "އަހަންނަށް ފެނޭ އިންސްޓަގްރާމް ކަހަކަ އެއްޗެހި ގެންގުޅޭ މީހުން އެ މީހުންގެ ފޭނުން ރުއްސަން ގަންނަހާ ގަނޑު. މިއީ އަސްލު ވަރަށް ބޮޑު ހާސްކަމެއް."
ކާމިޔާބު އެތައް ފިލްމެއް ކުޅެފައިވާ އެކްޓަރު ބުނީ އޭނަ އަކީ ފޮޓޯ އާއި ވީޑިއޯ ނަގަން ވެސް ލޯބިކުރާ މީހެއް ކަމަށެވެ. އެހެންވެ އިންސްޓަގްރާމް އެކައުންޓް ރަސްމީކޮށްފާނަންތޯ އެހުމުން ބުނީ އެކަމާ ނޫނެކޭ ބުނާކަށް ނުކެރޭނެ ކަމަށެވެ.
"ފަހުން ވާނެ ގޮތެއް ކިހިނެއް އެނގޭނީ؟" ސައިފް ބުންޏެވެ.
އޭނަގެ އާއިލާ އަށް ބަލާ އިރު އަންހެންން ކަރީނާ ކަޕޫރާއި ދޮށީ ދެ ދަރިން ކަމަށްވާ ސާރާ އަލީ ޚާނާއި އިބްރާހީމް އަލީ ޚާނަކީ ވެސް އިންސްޓަގްރާމް ބޭނުންކުރާ މީހުންނެވެ. މީގެ އިތުރުން ކޮއްކޮ ސޯހާ އަލީ ޚާނާއި އޭނަގެ ފިރިމީހާ ކުނާލް ކޭމޫ އަކީ ވެސް އިންސްޓަގްރާމްގައި އެކްޓިވްކޮށް އުޅޭ ބައެކެވެ.
ބޮލީވުޑްގެ މަޝްހޫރު ތަރިން ތެރެއިން ސޯޝަލް މީޑިއާ ރަސްމީކޮށް ބޭނުން ނުކުރާ އަނެއް ތަރި އަކީ ރަންބީރް ކަޕޫރެވެ.