މާފުށީ ޖަލު ބަލައިފާސް ކުރުމުގެ ބޮޑު އޮޕަރޭޝަނެއް ކަމާބެހޭ އިދާރާތަކުން ފަށައިފިއެވެ.
ފުލުހުން މިއަދު ބުނެފައިވަނީ، މާފުށީ ޖަލަށް ގަވައިދާ ހިލާފަށް އެތެރެކުރަމުންދާ ތަކެތި އަތުލައި، ޖަލުގައި ގާނޫނާ ހިލާފަށް ހިނގާކަންކަން ހުއްޓުވުމަށް ޖަލު ބަލައިފާސްކުރުމުގެ އޮޕަރޭޝަނެއް ފަށާފައިވާކަމަށެވެ.
މި އޮޕަރޭޝަންގައި 183 ފުލުހުން، 81 ސިފައިން އަދި ކަރެކްޝަންސްގެ 40 އޮފިސަރުން އަންނަނީ ބައިވެރިވަމުންނެވެ.
ފުލުހުން ބުނެފައިވަނީ މިއަދުގެ އޮޕަރޭޝަންގައި ޖަލުގެ 8 ޔުނިޓެއް ބަލައިފާސްކޮށްފައިވާ ކަމަށެވެ. އަދި މި ޔުނިޓްތަކުން 29 ފޯނު، 17 ޗާޖަރު، 12 ހެޑްސެޓު، 3 ޕެންޑްރައިވް، 3 އިއަރޕޮޑް، 3 ކޭބަލް އަދި 2 ސިމް ކާޑު ހޯދާފައިވާ ކަމަށެވެ. އަދި 4 ބޮގަރު ފުޅި ވެސް ހޯދާފައިވާ ކަމަށެވެ.
ފުލުހުން ބުނެފައިވަނީ މިތަކެތި ފުލުހުންގެ ބެލުމުގެ ދަށަށް ގެނެސް މައްސަލަ ތަހުގީގު ކުރަމުން ގެންދާ ކަމަށެވެ.
ކަރެކްޝަންސްގެ އޮފިސަރުންތަކެއް ރިޝްވަތު ނަގައިގެން މާފުށީ ޖަލަށް ފޯނާއި ޑްރަގްސް އެތެރެކުރާ މައްސަލައިގައި 13 ޖޫނިއަރ ރޭންކްގެ އޮފިސަރެއް ވަނީ ހައްޔަރު ކޮށްފައެވެ. ޖަލަށް ފޯނާއި ޑްރަގްސް ވައްދާ މައްސަލައިގައި 18 މުވައްޒަފަކު އުޅުނުކަން ފާހަގަކުރެވުނު ކަމަށާއި އޭގެން އެއް މުވައްޒަފެއްގެ އެކައުންޓަށް 24 މިލިއަން ރުފިޔާ ވަދެފައިވާ ކަމަށް ފުލުހުން މައުލޫމާތު ދީފައިވެއެވެ. އަދި މި 18 މުވައްޒަފުންގެ އެކައުންޓްތަކުން 73.6 މިލިއަން ރުފިޔާ ދައުރުވެފައިވާ ކަމަށާއި މި ފައިސާގެ އަދަދުތަކަކީ 2023 ޖެނުއަރީން ފެށީގެން ފާހަގަ ކުރެވިފައިވާ މުއާމަލާތްތަކެއް ކަމަށްވެސް މައުލޫމާތު ދީފައިވެއެވެ.