މޯލްޑިވްސް އެއަރޕޯޓްސް ކޮންޕެނީ ލިމިޓެޑްގެ މެނޭޖިންގް ޑިރެކްޓަރު ދުއްވުމަށް ހާއްސަކޮށްފައިވާ ކާރު ވަގަށް ނެގި މައްސަލައިގައި 2 މީހަކަށް ދައުވާ ކޮށްފިއެވެ.
ޕްރޮސިކިއުޓާ ޖެނެރަލްގެ އޮފީހުން މިއަދު ބުނެފައިވަނީ، 29 އޭޕްރީލް 2024 ވަނަ ދުވަހުގެ 07:00 ހާއިރު އެމްއޭސީއެލްގެ މެނޭޖިންގް ޑިރެކްޓަރ ދުއްވުމަށް ހާއްސަކޮށްފައިވާ ކާރެއް، ވެލާނާ އިންޓަނޭޝަނަލް އެއާޕޯޓްގެ ޓްރާންސްޕޯޓް އެންޑް ފެރީ ސާވިސް ބިލްޑިންގައި ޕާކްކޮށްފައި އޮއްވާ ވަގަށްނަގާފައިވާ މައްސަލައިގައި ދައުވާ ކުރުމަށް 27 ޖޫން 2024 ދުވަހު ކްރިމިނަލް ކޯޓަށް ހުށަހަޅާފައިވާ ކަމަށެވެ.
މި މައްސަލައިގައި ދައުވާ ކޮށްފައިވަނީ، މ. ސީނީއަސުރުމާގެ މުހައްމަދު ޚައިޝަމްއާއި، މ. މޮޑަންކޮމެޓް އަހްމަދު ނިޡާމްގެ މައްޗަށެވެ. މި ދެމީހުންގެ މައްޗަށް އުފުލާފައިވަނީ، އެހެން މީހެއްގެ މުދަލެއްގެ މައްޗަށް ހުއްދަނޫން ގޮތެއްގައި ބާރު ހިންގުމުގެ ކުށުގެ ދައުވާއެވެ. އަދި އަހްމަދު ނިޡާމްގެ މައްޗަށް ވަނީ އެއްވެސް މީހަކަށް އޮޅުވާލުމުގެ ނިޔަތުގައި އެއްޗަކަށް ބަދަލު ގެނައުމުގެ ދައުވާއާއި މުދަލަށް ގެއްލުންދިނުމުގެ ދައުވާ އުފުލާފައެވެ.
މި ދެމީހުންގެ މައްޗަށް އެހެން މީހެއްގެ މުދަލެއްގެ މައްޗަށް ހުއްދަނޫން ގޮތެއްގައި ބާރު ހިންގުމުގެ ދައުވާ އުފުލާފައިވަނީ އެ ދެމީހުން 29 އޭޕްރިލް 2024 ދުވަހުގެ 00:00 އާއި، 06:30 އާ ދެމެދުގެ ވަގުތެއްގައި މޯލްޑިވްސް އެއަރޕޯޓްސް ކޮމްޕެނީ ލިމިޓެޑްގެ މެނޭޖިން ޑިރެކްޓަރު ދުއްވުމަށް ހާއްސަކޮށްފައިވާ ވޭން، އެކުންފުންޏަށް ނޭނގި ނަގައިގެން ގޮސްފައިވާތީއެވެ.
މީގެއިތުރުން އަޙްމަދު ނިޡާމްގެ މައްޗަށް، އެއްވެސް މީހަކަށް އޮޅުވާލުމުގެ ނިޔަތުގައި އެއްޗަކަށް ބަދަލު ގެނައުމުގެ ދައުވާ އުފުލާފައިވަނީ ވޭންގެ އިންޖީނު ނަންބަރާއި ޗެސިސް ނަންބަރު ކަހާލާއި، އެ އުޅަނދުގެ އަސްލު އޮޅުވާލުމަށް މަސައްކަތް ކޮށްފައިވާތީއެވެ. އަދި މުދަލަށް ގެއްލުންދިނުމުގެ ދައުވާ އުފުލާފައިވަނީ، އެ ވޭންގެ އިންޖީނު ނަންބަރާއި ޗެސިސް ނަންބަރު ކަހާލާއި، އެ އުޅަނދަށް ގެއްލުން ދީފައިވާތީއެވެ.
މި މައްސަލައިގައި ވަގަށް ނަގާފައިވާ ވެހިކަލްގެ އަގަކީ 34560 އެމެރިކާ ޑޮލަރު ކަމަށް ޕީޖީން މައުލޫމާތުދެއެވެ.