މަސްވެރިންނަށް ދޭން ޖެހޭ ފައިސާ މިއަދު ދޫކުރަން ފެށުމާ ގުޅިގެން، ފައިސާ ލިބުން ލަސްވެގެން މުޒާހަރާ ކުރަމުން ދިޔަ މަސްވެރިން މުޒާހަރާ ކުރުން ހުއްޓާލައިފި އެވެ.
ފައިސާ ލިބުން ލަސްވެގެން އައްޑޫ މަސްވެރިން މުޒާހަރާކުރާތާ ހަފުތާއަކަށް ވުރެ ގިނަ ދުސްވެފައިވާ އިރު، މިދިޔަ ހަފުތާގެ ތެރެގައި ދ. ކުޑަހުވަދޫގެ މަސްވެރިންތަކެއް ވެސް މުޒާހަރާކޮށްފައިވެ އެވެ. އަދި ބައެއް ރަށްރަށުގައި ކުރިން ވަނީ ފައިސާ ލިބުން ލަސްވެގެން މުޒާހަރާކޮށްފަ އެވެ.
މަސްވެރިންނަށް މިއަދު ފައިސާ ދޫކުރަން ފަށާނެކަން މިފްކޯ އިން އިއުލާންކުރީ އިއްޔެ ހަވީރު އެވެ.
އެ ކުންފުނިން ބުނީ، މަސްވެރިންނަށް ދޭން ޖެހޭ ފައިސާ މިއަދު ޖަމާކުރަން ފަށާފައިވާތީ މަސްވެރިންގެ މުޒާހަރާތައް ހުއްޓާލާފައިވާ ކަމަށެވެ. އެގޮތުން މަސްވެރިންނަށް ދޫކުރަން ޖެހޭ 53 މިލިއަން ރުފިޔާ މަސްވެރިންނަށް ޖަމާކުރުމުގެ މަސައްކަތް މިހާރު ކުރިއަށްދާ ކަމަށް މިފްކޯ އިން ބުންޏެވެ.
މަސްވެރިންނަށް ފައިސާ ދޫކުރަން ފެށި އިރު، މިފްކޯ އިން ވަނީ މިއަދުން ފެށިގެން މަސް ގަންނަ އަގު ދަށްކޮށްފަ އެވެ. އެގޮތަށް ނިންމީ މިހާރު މަސް ގަންނަމުންދާ ގޮތަށް މާކެޓު އަގަށް ރިއާޔަތްނުކޮށް މަސްވެރިންގެ އަތުން މަސްގަނެ ޕްރޮސެސްކޮށް އެކްސްޕޯޓުކުރަމުން ދިއުމަކީ މާލީ ގޮތުން ދެމެހެއްޓެނިވި ކަމަކަށް ނުވާތީ ކަމަށް ބުންޏެވެ.