ސަރުކާރުގެ މިހާރުގެ އަމާޒަކީ މަސްވެރިން މިފްކޯ އަށް ކިރުވާ މަހަށް ދޭން ޖެހޭ ފައިސާ ލަސްވެގެން ދެ ހަފުތާ ތެރޭގައި ދޫކުރުން ކަމަށް ފިޝަރީޒް މިނިސްޓަރު އަހުމަދު ޝިޔާމް ވިދާޅުވެއްޖެ އެވެ.
މިއަދު ބޭއްވި ނޫސްވެރިންގެ ބައްދަވުމުގައި އޭނަ ވިދާޅުވީ މިފްކޯއިން މިއަދުން ފެށިގެން މަސް ގަންނާނީ ބައިނަލްއަގުވާމީ ބާޒާރުގައި އަގުތައް ހުރި ގޮތަށް ބެލުމުގެ އިތުރުން އެކްސްޕޯޓު ކުރުމަށް ހިނގާ ހަރަދަށް ރިއާޔަތް ކުރުމަށް ފަހު ކަމަށެވެ.
"އެހެންވެ އަމާޒަކީ މިގެނެވޭ ބަދަލާއެކު، ދެ ހަފުތާ ތެރޭގައި ފައިސާ ދިނުން." ޝިޔާމް ވިދާޅުވި އެވެ.
އޭނަ ވިދާޅުވީ މިފްކޯ އިން މަސް ގަންނަ އަގުތައް ކޮންމެ ހަފުތާއެއް ވެސް ގައިއިއުލާން ކުރާނެ ކަމަށާއި ކަމަށާއި ބައިނަލްއަގުވާމީ މާކެޓަށް ރިއާޔަތް ނުކޮށް މަސް ގަތުމުން ކުންފުންޏަށް މާލީ ގޮތުން ގެއްލުންވަމުންދާ ކަމަށެވެ.
މަސްވެރިން ކިރާ މަހަށް ގިނަވެގެން 48 ގަޑިއިރު ތެރޭގައި ފައިސާ ދިނުމަކީ މި ސަރުކާރުގެ ވައުދެކެވެ. ނަމަވެސް އެގޮތަށް ފައިސާ ދޫކުރެވެން މިހާރު ނެތީ މިފްކޯ މާލީ ހާލަތު ހުރި ގޮތުން ކަމަށް މިނިސްޓަރު ވިދާޅުވި އެވެ.
މަސްވެރިންނަށް ލިބެން ޖެހޭ ފައިސާ ލަސްވުމާއި ރައީސް ޑރ. މުހައްމަދު މުއިއްޒު ވައުދުވެވަޑައިގަތް ގޮތަށް 48 ގަޑިއިރު ތެރޭގައި ފައިސާ ދޫނުކުރޭތީ ފާއިތިވި ހަފުތާއެއްހާ ދުވަހުގެ ތެރޭގައި ބައެއް ހިސާބުތަކުގައި މަސްވެރިން މުޒާހަރާކޮށްފައިވެ އެވެ. ނަމަވެސް މިއަދު ފައިސާ ދޫކުރަން ފެށުމުން މަސްވެރިން ވަނީ މުޒާހަރާ ހުއްޓާލައިފަ އެވެ.
ޝިޔާމް ވިދާޅުވީ ސަރުކާރުގެ އަމާޒަކީ މާލީ ގޮތުން މިފްކޯއަށް ފައިދާވާ މިންވަރަށް ބަލައި, ކުރިއަށް އޮތް ދޮޅު އަހަރު ތެރޭގައި މިފްކޯއަށް ކިރާ މަހަށް 48 ގަޑިއިރު ތެރޭގައި ފައިސާ ދޫކުރުމުގެ އަމާޒަށް ވާސިލުވުން ކަމަށެވެ.