އައްޑޫގައި އިއްޔެ އަލިފާނުގެ ތިން ހާދިސާއެއް

އައްޑޫގައި އިއްޔެ އަލިފާނުގެ ތިން ހާދިސާއެއް ހިނގައިގެން ސިފައިން ހަރަކާތްތެރިވެއްޖެ އެވެ.

އެމްއެންޑީއެފުން ބުނީ އެ ތިން ހާދިސާގެ ތެރެއިން ފުރަތަމަ ހާދިސާ ހިނގީ އިއްޔެ ހަވީރު ހުޅުމީދޫ މާފިށި ސަރަހައްދު ވަލުތެރޭގަ އެވެ. އެގޮތުން ހަވީރު 5:30 އެހާއިރު އެމްއެންޑީއެފް ސަދަން އޭރިއާ ކޮމާންޑް، ހުޅުމީދޫ ފަޔަ ސްޓޭޝަނަށް ލިބުމާއެކު، އެތަނުގެ ފަޔަ ފައިޓަރުން ވަނީ އެ ސަރަހައްދަށް ގޮސް އަލިފާން ނިއްވުމުގެ މަސައްކަތް ކޮށްފަ އެވެ. ވަލުތެރޭގައި ރޯވި އަލިފާން ނިއްވާލެވުނީ އިރުއޮއްސި 6:00 ޖަހަން އުޅެނިކޮށެވެ.

އަލިފާންގެ ދެވަނަ ހާދިސާ ހިނގީ ހިތަދޫ އައިސް ޕްލާންޓް ކައިރީ ވަލުތެރޭގައެވެ. އެ މައުލޫމާތު އިރުއޮއްސި 6:39 ހާއިރު އެމްއެންޑީއެފް ސަދަން އޭރިއާ ކޮމާންޑް، ހިތަދޫ ފަޔަރ ސްޓޭޝަނަށް ލިބުމާއެކު، އެ ތަނުގެ ފަޔަ ފައިޓަރުން ވަނީ އެ ސަރަހައްދަށް ގޮސް އަލިފާން ނިއްވުމުގެ މަސައްކަތް ކޮށްފައެވެ. އެގޮތުން ރޯވި އަލިފާން ނިއްވައިލެވުނީ ރޭ 7:00 ޖަހަން އުޅެނިކޮށެވެ.

އިއްޔެގެ އަލިފާނުގެ ތިން ވަނަ ހާދިސާ އަކީ މީދޫ ބޮންޑޯ އެޅަގެ ގޯތި ތެރޭގައި ހުރި ރުކެއްގައި އަލިފާން ރޯވުމެވެ. އެ ހާދިސާގެ މަޢުލޫމާތު މރޭ 8:01 ހާއިރު އެމްއެންޑީއެފް ސަދަން އޭރިއާ ކޮމާންޑް ހުޅުމީދޫ ފަޔަ ފައިޓަރުން ގޮސް އަލިފާން ނިއްވުމުގެ މަސައްކަތް ކޮށްފައިވެއެވެ. އެގޮތުން، ރުކުގައި ރޯވި އަލިފާން ނިއްވާލެވުނީ ރޭ 8:30 އެހާކަށްހާ އިރު އެވެ.

މިދިޔަ މަހުގެ ފަހުކޮޅު އައްޑޫ ނޭޗާ ޕާކް ސަރަހައްދުގައި ހުރި ފަޅު ގޯއްޗެއްގައި ރޯވެގެންނާއި ހިތަދޫ އޮޑައްސައު ސަރަހައްދު ވަލުތެރޭގައި ހުރި ދަރުތަކެއްގައި ރޯވުމުގެ އިތުރަށް ފްލެޓް ސަރަހައްދުގައި ވެސް ރޯވެގެން އެމްއެންޑީއެފް ސަދަން އޭރިއާ އިން ހަރަކާތްތެރިފައިވެ އެވެ.