އެގްރޯނެޓްގެ މުވައްޒަފުންނަށް އަމާޒުކޮަށްގެން ދަނޑުވެރިކަމާ ގުޅޭ ތަމްރީނު ޕްރޮގްރާމެއް ފަށައިފި އެވެ.
ހދ. ހަނިމާދޫގައި މި ޕްރޮގްރާމް އިއްޔެ ފައްޓަވައި ދެއްވި ހަޔަ އެޑިއުކޭޝަން މިނިސްޓަރު ޑރ. މަރްޔަމް މާރިއާ އެވެ.
މި ޕްރޮގްރާމަކީ އެގްރިކަލްޗަ މިނިސްޓްރީ އާއި ޔޫއެންޑީޕީގެ އިތުރުން އަދި އެގްރޯ ނެޝަނަލް ކޯޕަރޭޝަން ގުޅިގެން ޖަޕާން ސަރުކާރުގެ ހިލޭ އެހީގައި ކުރިއަށް ގެންދާ ޕްރޮޖެކްޓް ފޮ ޑިވެލޮޕިންގް ސަސްޓެއިނަބަލް އެގްރިކަލްޗަރަލް އެކޮނޮމީގެ ދަށުން ފެށި ޕްރޮގްރާމެކެވެ.
އެގްރޯނެޓްގެ މުވައްޒަފުންގެ މެދުގައި ދަނޑުވެރިކަމުގެ ހުނަރާއި އިލްމީ ޤާބިލުކަން އިތުރު ކުރުމަށްޓަކައި 18 ދުވަހުގެ މުއްދަތަށް ކުރިއަށް ގެންދަން ހަމަޖެހިފައިވާ ޕްރޮގްރާމްގައި އެގްރޯނެޓްގައި ރަޖިސްޓްރީވެގެން ދަނޑުވެރިކަން ކުރާ 14 މީހަކު ބައިވެރިވެ އެވެ.
މި ޕްރޮގްރާމްގެ ބައިވެރިން ތަމްރީންގެ ފުރަތަމަ 12 ދުވަސް ހޭދަކުރާނީ ހަނިމާދޫގައެވެ. ތިއަރީ ކްލާސްތަކާއި ޕްރެކްޓިކަލް ކްލާސްތަކުގެ އިތުރުން ހއ. މާފަހީގައި ކުރާ ދަނޑުވެރިކަމުގެ މަސައްކަތްތަށް ބަލައި އަމަލީ ތަޖުރިބާ ޙާޞިލް ކުރުމަށް ފަހު މި މަހުގެ 13 ވަނަ ދުވަހު ބައިވެރިން އެނބުރި ވަޒީފާ އަދާކުރާ ރަށްރަށަށް ދާނެ އެވެ.
އެގޮތުން ތަމްރީން ޕްރޮގްރާމްގެ ބާކީ ހަ ދުވަހުގެ ސެޝަންތަށް ކުރިއަށް ގެންދިއުމަށް ހަމަޖެހިފައި ވަނީ އޮންލައިންކޮށް ކަމަށް މިނިސްޓްރީން ބުންޏެވެ.
މި ޕްރޮގްރާމްގައި ކިޔަވައި ދިނުމަށް ހަމަޖެހިފައިވާ ބައިތަކުގެ ތެރޭގައ ހިމެނެނީ ޕްލާންޓް ޕްރޮޕަގޭޝަން ޓެކްނިކްސް ނުވަތަ ކުދި ގަސް އުފައްދާނެ ތަފާތު ގޮތްތަކާއި ނާސަރީއެއްގައި ގަސް ބަލަހައްޓާ މެނޭޖްކުރާނެ ގޮތާއި، ގަސްހެއްދުމަށްޓަކައި ފަސްގަނޑު މުއްސަނދިކުރާނެ ގޮތާއި ގަހަށް ބޭނުންވާ އެކި ކަހަލަ މާއްދާތައް ނުވަތަ ނިއުޓްރިއެންޓްސް ގަހަށް ފޯރުކޮށްދޭނެ ގޮތްތަކާއި، ގަހަށްޖެހޭ ތަފާތު ބަލިތައް ދެނެގަނެ އެބަލިތަކުން ރައްކާތެރިވާނެ ގޮތާއި ބައްޔެއް ޖެހިއްޖެ ޙާލަތެއްގައި އަޅާނެ ފިޔަވަޅުތަކުގެ އިތުރުން ދެމެހެއްޓެނިވި ގޮތެއްގައި ދަނޑުވެރިކަން ކުރުމަށް ބޭނުންވާނެ މޯލްޑިވްސް ގުޑް އެގްރިކަލްޗަ ޕްރެކްޓިސް ފަދަ މުހިންމު ބައިތައް ހިމެނެ އެވެ.