ޕާކިސްތާންގެ މަޝްހޫރު ތަރިން ކަމަށްވާ ފަވާދު ޙާނާއި ސަނަމް ސައީދުގެ އާ ވެބް ސީރީޒް "ބަރުޒަޚް" ގެ ޓްރެއިލާ އާންމުކޮށްފި އެވެ.
ގިނަ ބަޔަކު ވަރަށް ބޮޑަށް އިންތިޒާރު ކުރަމުން އަންނަ މި ސީރީޒް ޕްރީމިއާ ކުރަން ހަމަޖެހިފައި ވަނީ މި މަހުގެ 19 ގަ އެވެ.
އަސަރު ގަދަ ލޯބީގެ ވާހަކައެއް ކިޔައިދޭނެ "ބަރްޒަޚް" ބެލުންތެރިންނަށް ދޫކޮށްލަން ހަމަޖެހިފައި ވަނީ އިންޑިއާގެ ދެ ސްޓްރީމިން ޕްލެޓްފޯމެއް ކަމަށްވާ ޒީ5 އާއި ޒީ ޒިންދަގީގެ ޔޫޓިއުބް ޗެނެލުންނެވެ.
މި ސީރީޒް ލިޔެ، ޑައިރެކްޓްކުރީ 2020 ގައި ޒީ5 އިން ގެނެސްދިން މަގުބޫލު ސީރީޒް "ޗުރައިލްސް" ގެ ވެސް ހެދި އާސިމް އައްބާސީ އެވެ.
ފަވާދާއި ސަނަމް އެކީީގައި ސީރީޒަކުން ބެލުންތެރިންނާ ބައްދަލު ކުރަން ކުޑަތަންވަމުބް އަންނަ އިރު، މި ދެ ތަރިން އެކީގައި ކުރިން ވަރަށް ކާމިޔާބު ޓީވީ ސިލްސިލާއެއް ކުޅެފައިވެ އެވެ. އެއީ ހަމް ޓީވީން 2012-2013 އަށް ގެނެސްދިން "ޒިންދަގީ ގުލްޒާރު ހޭ" އެވެ.
ފަވާދާއި ސަނަމް މިހާރު އަންނަނީ އިތުރު ސީރީޒެއްގެ މަސައްކަތް ވެސް ކުރަމުންނެވެ. އެއީ ސޮނީ ލިވް އެޕަށް ހަދާ "ޝަންދޫރު" އެވެ. މީގެ މަސައްކަތް ފެށީ މިދިޔަ މަހުގެ ތެރޭގަ އެވެ.