އާންމުކޮށް ތެލެގޫ އާއި ކަންނާޑާ ފިލްމުތައް ކުޅޭ އިންޑިއާގެ ދެކުނުގެ ޒުވާން ބަތަލާ ސްރީލީލާ ބޮލީވުޑަށް ނުކުންނަން ތަައްޔާރުވަމުން އަންނަ ކަމަށް ރިޕޯޓްތައް ބުނެފި އެވެ.
ފިލްމީ ޚަބަރުތައް ގެނެސްދޭ މީޑިއާތަކުން ބުނީ 23 އަހަރުގެ ބަތަލާ އަށް މިހާރު ހިންދީ ދެ ފިލްމަކުން ފުރުސަތު ލިބިފައިވާ ކަމަށެވެ. މީގެ ތެރެއިން އެއް ފިލްމަކީ އެކްޓަރު ވަރޫން ދަވަނާ އެކީ އޭނަގެ ބައްޕަ ޑޭވިޑް ދަވަން ހަދަން ތައްޔާރުވަމުން އަންނަ ރޮމޭންޓިކް ކޮމެޑީ އެވެ.
ނަން އަދި އިއުލާން ނުކުރާ އެކަމަމު އަންނަ އަހަރުގެ އޮކްޓޯބަރު 2 ގައި ސިނަމާތަކަށް ގެންނަން ތާވަލުކޮށްފައިވާ މި ފިލްމަކީ ރަމޭޝް ތައުރާނީ ޕްރޮޑިއުސްކުރާ އެއްޗެކެވެ.
މީގައި ވަރޫންއާ އެކީ ދެ ބަތަލާއިން ހިމެނޭ އިރު، އޭގެ ތެރެއިން އެކަކީ މުރްނާލް ތާކޫރެވެ. ބައެއް މީޑިއާތަކުން ބުނީ ފިލްމުގެ ދެވަނަ ބަތަލާއަކަށް ރަކުލް ޕްރީތު ސިންގް ގެންނަން ކުރިން ވާހަކަތަކެއް ދެކެވުނު ނަމަވެސް، ވަރޫންއާ އެކީ ފިލްމުގައ ދެން ހިމެނޭނީ ސްރީލީލާ ކަމަށެވެ.
އޭނަ އަށް ލިބުނު ކަމަށް ވާހަކަ ދެކެވޭ އަނެއް ފިލްމަކީ ބޮލީވުޑަށް ތައާރަފުވުމުގެ މަގުމަތީގައި ހުރި އެކްޓަރު ސައިފް އަލީ ޚާންގެ ދަރިފުޅު އިބްރާހީމް އަލީ ޚާނާ އެކީ ޕްރޮޑިއުސަރު ދިނޭޝް ވިޖަންގެ މެޑޮކް ފިލްމްސް އިން ހަދަން ނިންމާފައިވާ "ޑިލަރު" އެވެ. އަންނަ އަހަރު ފިލްމު ބެލުންތެރިންނަށް ގެނެސްދޭނެކަން އިއުލާންކޮށްފައި އޮތަސް މި ފިލްމު އަދި ރަސްމީކޮށް ލޯންޗެއް ނުކުރެ އެވެ.
އެމެރިކާގެ ޑިޓްރޮއިޓަށް އުފަން ސްރީލީލާ އެކްޓިން އަށް ނުކުތީ 2017 ގަ އެވެ. އޭނަގެ އެންމެ ފަހުގެ ފިލްމަކީ ޖެނުއަރީގައި ރިލީޒްކުރި މަހޭޝް ބާބޫގެ "ގުންތޫރު ކާރަމް" އެވެ. ސްރީލީލާގެ ކުރިއަށް ހުރި ފިލްމުތަކުގެ ތެރޭގައި "ރޮބިންހުޑް" އާއި "އުސްތާދު ބަގަތު ސިންގް" ހިމެނެ އެވެ.