މާލެ އާއި ހުޅުމާލެ ހައި ސްޕީޑު ފައިބަ އޮޕްޓިކް އާ ނެޓްވޯކަކުން ގުޅުވާލައިފި އެވެ.
ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން މި ނެޓްވޯކް ގާއިމުކުރި އިރު. އެ ކުންފުނިން ކުރިން ވަނީ ހުޅުމާލޭގެ އެއްވަނަ އާއި ދެވަނަ ފިޔަވަހީގައި ވެސް ފައިބަ އޮޕްޓިކް ނެޓްވޯކު އަޅައިފަ އެވެ. އެޗްޑީސީގެ ފައިބަ އޮޕްޓިކް ނެޓްވޯކުގެ ތެރެއިން ލީސް ލައިނާއި ޑާކް ފައިބަގެ ހިދުމަތަށް އެދުމުގެ ފުރުސަތު ވެސް ވިޔަފާރިތަކަށް މިހާރު އޮތީ ހުޅުވާލައިފަ އެވެ.
"ވިޔަފާރިތަކަށް ހެޔޮ އަގެއްގައި ޑޭޓާ ކަނެކްޓިވިޓީ ފޯރުކޮށްދިނުމަކީ އެޗްޑީސީގެ އަމާޒެެއް. އެހެންކަމުން، މި ނެޓްވޯކް މާލެ އާއި ހުޅުމާލެއާ ދެމެދު ގުޅުވާލެވުމާއެކު، ވިޔަފާރިތައް ބާރުވެރިކޮށް، ކުދި އަދި މެދުފަންތީގެ ވިޔަފާރިތަކަށް ގިނަ ފުރުސަތުތަކެއް ފަހިވެގެންދާނެ." އެޗްޑީސީން ބުންޏެވެ.
މި ނެޓްވޯކް ގާއިމު ކުރުމާ އެކީ ކަނެކްޓިވިޓީ ހިދުމަތަށް އެންމެ ފުރަތަމަ ސޮއިކުރީ މޯލްޑިވްސް އިސްލާމިކް ބޭންކް (އެމްއައިބީ) އެވެ.
އެޗްޑީސީން ބުނީ ހިދުމަތް ހޯދާ ކަސްޓަމަރުންނަށް މަސް ދުވަހުގެ މުއްދަތަކަށް ހިލޭ ހިދުމަތް ލިބޭނެ ކަމަށެވެ.