މި އަހަރުގެ ކުރީކޮޅު ގެެނެސްދިން "ފުރޭތަ" ގެ ކާމިޔާބީ އަށް ފަހު، ޑާކް ރެއިން އެންޓަޓައިންމަންޓުން އަނެއްކާ ވެސް އެކްޝަން ތުރިލާއަކަށް ތައްޔާރުވާން ފަށައިިފި އެވެ.
އަންނަ މަހުގެ ތެރޭގައި ޝޫޓިން ފަށަން ޕްލޭންކޮށްފައިވާ މި ފިލްމުގެ ނަން އަދި ރަސްމީކޮށް ފައިނަލްނުވާތީ މީގެ ވާކިން ޓައިޓްލްއަކަށް މި ވަގުތު ބޭނުން ކުރަނީ "ޑާކް ރެއިން ޕްރޮޖެކްޓް 37" އެވެ. މިއީ އެ ސްޓޫޑިއޯގެ 37 ވަނަ ޕްރޮޖެކްޓެވެ.
މީގެ ތައްޔާރީތައް މިހާރު ކުރިއަށްދާ އިރު، މުހައްމަދު އަލީ (މޮގާ) އާއި އަންހެނުން އައިޝަތު ފުއާދު ތައުފީގު ޕްރޮޑިއުސްކުރާ ފިލްމުގެ ޑައިރެކްޓްކުރަނީ "ފުރޭތަ" ގެ ޑައިރެކްޓަރު އަލީ ޝިފާއު (ޗިއްޕެ) އާއި އެ ފިލްމުގެ ވިލަންގެ ރޯލު ކުޅުނު އަދި ބެލުންރެރިންގެ ވަރަށް ބޮޑު މަގުބޫލު ކަމެއް ހޯދި "ވިޝްކާ" ގެ ޑައިރެކްޓަރު ރަވީ ފާރޫގެވެ.
ޗިއްޕެ އާއި ރަވީ އެކުވެގެން ޑައިރެކްޓްކުރާ ފިލްމުގެ ސްކްރީންޕްލޭ ލިޔެފައި ވަނީ "ފުރޭތަ" ގެ ވެސް ސްކްރީން ރައިޓަރު އަހުމަދު ތޮލާލެވެ.
މޮގާ މިއަދު ބުނީ "ޑާކް ރެއިން ޕްރޮޖެކްޓް 37" އަށް ކާސްޓުން ވެސް ފައިނަލް ކުރުމުގެ ކަންކަން މިހާރު ކުރިއަށްދާ ކަމަށެވެ.
ރާއްޖޭގެ މިހާރުގެ އެންމެ ކާމިޔާބު ސްޓޫޑިއޯ އިން އިތުރު އެކްޝަން ތުރިލާއެއް ހަދަން ނިންމި އިރު، މާޗްގައި އެޅުވި "ފުރޭތަ" އަކީ ބެލުންތެރިންގެ ބޮޑު ތަރުހީބެއް ލިބުނު ރިވެންޖް/އެކްޝަން ތުރިލާއެކެވެ.
ޑާކް ރެއިނުން ދެން އެންމެ އަވަހަށް ސްކްރީނަށް ގެންނަން އޮތީ އޮކްޓޯބަރު 7 އަށް ތާވަލުކޮށްފައިވާ އެ ސްޓޫޑިއޯގެ ފުރަތަމަ ހޮރޯ-ކޮމެޑީ "ބިބީ" އެވެ. މިއީ "ފުރޭތަ" ގެ ބަތަލު ޝަރަފު އަބްދުﷲ ގެ އަންހެނުން ޝަހުދާ މަހުމޫދު ލިޔެ، ޑައިރެކްޓްކޮށް ގެނެސްދޭ ފުރަތަމަ ފީޗާ ފިލްމެވެ.