އުރަމަތީގެ ކެންސަރު ޖެހިފައިވާ އިންޑިއާގެ ބަތަލާ ހީނާ ޚާން ބައްޔާ ގުޅިގެން ކީމޯތެރަޕީ ފަރުވާ ނަގަން ފަށައިފި އެވެ.
އޭނަ އިންސްޓަގްރާމް ޕޯސްޓެއްގައި މިއަދު ބުނީ ކީމޯގެ ފުރަތަމަ ސެޝަން ނެގީ ރޭ ކަމަށެވެ. އަދި މިކަމާ ވަރަށް ކެތްތެރިކަމާ އެކީ ކުޔުރިމަތިލާން ބޭނުންވާ ކަމަށާއި އުރަމަތީގެ ކެންސަރު ފަދަ ބަލީގެ ޝިކާރައަކަށްވެއްޖެ ނަމަ އެފަދަ ކަންކަމާ ހިތްވަރާ އެކީ ކުރިމަތިލައި، ފަރުވާ އަވަސްކޮށް، ބަލިން ފަސޭހަވާން އެންމެން ވެސް މަސައްކަތް ކުރަން ޖެހޭނެ ކަމަށް ހީނާ ބުންޏެވެ.
އޭނަ ބުނީ ކެންސަރު ބަލީގެ އަމިއްލަ ތަޖުރިބާ ހަދަން ބޭނުން ވަނީ އެހެން މީހުންނަށް ވެސް ހިތްވަރު ލިބޭ ކަހަލަ ކަމަކަށް ކަމަށެވެ. އަދި މި ދަތި އުނދަގޫ، ހަޔާތުގެ ގޮންޖެހުން ބޮޑު ވަގުތާ ކުރިމަތިލައި، ބަލިން ފަސޭހަވެ، ކުރިއަށް ވުރެ ދުޅަހެޔޮކޮށް އެނބުރި އަންނާނެ ކަމަށް ހީނާ ބުންޏެވެ.
އޭނަ އަށް އުރަމަތީގެ ކެންސަރު ޖެހުނު ވާހަކަ އިއުލާންކުރީ މިދިޔަ ހުކުރު ދުވަހު އެވެ. އެއާ އެކީ ހީނާ އަށް ވަރަށް ގިނަ ބަޔަކު އަންނަނީ އަވަސް ޝިފާއަކަށް އެދެމުންނެވެ.
އާންމުންގެ މެދުގައި 36 އަހަރުގެ ބަތަލާ މަޝްހޫރުވެގެން ދިޔައީ ސްޓާ ޕްލަސް އިން ގެނެސްދޭ "ޔޭ ރިޝްތާ ކިޔާ ކެހެލާތާ ހޭ" ގައި ކުރިން ކުޅުނު އަކްޝަރާގެ ރޯލުންނެވެ.