އައްޑޫގައި ހުންނަ މިފްކޯގެ ފިޝަރީޒް ކޮމްޕްލެފްސް އޭއެފްސީ) ގައި މަސްވެރިން ކުރި މުޒަހާރާތަކާ ގުޅިގެން އެތަނަށް ލިބުނު ގެއްލުންތަކާ ގުޅޭ އެސެސްމަންޓެއް ހެދުމުގެ މަސައްކަތް މިފްކޯ އިން ފަށައިފި އެވެ.
ކިރުވި މަހަށް ފައިސާ ނުލިބިގެން އައްޑޫ މަސްވެރިން ހުޅުމީދޫގައި ހުންނަ ކޮމްޕްލެލްސްފައި މުޒާހަރާކުރަން ފެށީ މިދިޔަ މަހުގެ 21 ގަ އެވެ. އަދި އިއްޔެ އެ މުޒާހަރާ ނިމުމަކަށް ގެނައި އިރު، މަސްވެރިން އޮތީ މުޒާހަރާގެ ތެރޭގައި ކޮމްޕްލެކްސްގެ އޮޕަރޭޝަންސް ހުއްޓުވައިފަ އެވެ.
މަސްވެރިން އިއްޔެ މުޒާހަރާ ހުއްޓައިލީ މިފްކޯ އިން ފައިސާ ދިނުމާ ގުޅިގެންނެވެ.
ދިހަ ވަރަކަށް ދުވަހަށް ދެމިގެން ދިޔަ މުޒާހަރާގެ ސަބަބުން އޭއެފްސީގެ 125 އެއްހާ މުވައްޒަފުންގެ ވަޒީފާގެ މާހައުލު ގެއްލި، އެ މީހުން އަސާސީ އެތައް ކަމަކަށް ބުރީ އެރި ކަމަށް މިފްކޯ އިން ބުންޏެވެ. އެގޮތުން ކެއިން ބުއިމާއި، ގަޟާ ހާޖާ ކުރުމާއި، ނިދުން ފަދަ އެތަކެއް އަސާސީ ހައްގުތަކެއް މަސްވެރިންގެ މުޒާހަރާގެ ސަބަބުން ހަނިވެގެން ދިޔަ ކަމަށް ބުނެފައިވެ އެވެ.
ސަރުކާރުގެ މަސް ކުންފުނިން ބުނީ މުޒާހަރާގެ ބައިވެރިންގެ ބިރު ދެއްކުމުގެ ތެރެއިން ކުންފުންޏަށް ޖެހުނީ ހުރިހާ މުވައްޒަފުން ވަގުތީ އެކޮމޮޑޭޝަނަކަށް ބަދަލުކޮށް، ނިދުމާއި، ފާހާނާ ކުރުމާއި، ކެއިން ބުއިމާއި އެ ނޫންވެސް ޒަރޫރީ ކަންކަން ހަމަޖައްސަން ކަމަށެވެ. އަދި މުވައްޒަފުންގެ ސަލާމަތާއި ރައްކާތެރިކަން ކަށަވަރު ކުރުމުގެ ގޮތުން އޭއެފްސީ އެއްކޮށް ހުއްޓުމަކަށް ގެންދިޔުމަށް ފަހު، މުވައްޒަފުން އެހެން ތަނަކަށް ބަދަލު ކުރުމުގެ މަރުހަލާގެ ތެރެއިން މުޒާހަރާގެ ބައިވެރިން މުވައްޒަފުންގެ މެސް ރޫމުގެ ދޮރު ހަލާކުކޮށްލައިގެން ވަދެ، ކައިބޮއި ވެސް ހެދި ކަމަށް މިފްކޯ އިން ބުންޏެވެ.
އެގޮތުން ބިރު ދެއްކުންތަކާ ހެދި ސީނިއާ މުވައްޒަފުންނަށް ފުލުހުންގެ ހިމާޔަތް ހޯދާން ޖެހި އޭފްސީގެ މުވައްޒަފަކަށް ވެސް އަނިޔާވި ކަމަށް މިފްކޯ އިން ބުންޏެވެ.
މިފްކޯ އިން ވަނީ އެ ހާލަތުގައި އޭއެފްސީގެ މުވައްޒަފުން އަދާކުރި ދައުރާއި ދެއްކި ހިތްވަރަށް ޝުކުރު ވެސް އަދާކޮށްފަ އެވެ.
"ވަރަށް ދަތި އުނދަގޫ ހާލަތެއްގައި މުޅި ކުންފުންޏާއި ކުންފުނީގެ މުދަލާއި މުވައްޒަފުންގެ މަސްލަހަތު އިސްކޮށް އަމިއްލަ އިސް ނެގުމަށް ހާލަތު ބުނެ ދިނުމާއި މުޒާހަރާގެ ބައިވެރިންނާ މުއާމަލާތް ކުރުމާއި ފެސިލިޓީ ބެލެހެއްޓުމާއި މެނޭޖްމަންޓާ ގުޅިގެން މުޅި ހާލަތި މެނޭޖް ކުރުމުގައި ވަނީ ލާމަސީލު ނަމޫނާ ދައްކާފައި." މިފްކޯ އިން މިއަދު ބުންޏެވެ.
މަސްވެރިންގެ މުޒާހަރާއާ ގުޅިގެން އޭއެފްސީއަށާއ، ކުންފުންޏަށް ލިބުނު ގެއްލުން ދެނެގަތުމަށް ހަދާ އެސެސްމެންޓް ރިޕޯޓް ނިމުނުހާ އަވަހަކަށް އެ އާންމު ކުރާނެ ކަމަށް މިފްކޯ އިން ބުންޏެވެ.