މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ގަވަރުނަރު އަލީ ހާޝިމް މަގާމުން ވަކިކުރަން ހުށައަޅާފައިވާތީ އެ މައްސަލާގައި އޭނަ އަށް ޖަވާބުދާރީވާން ފުރުސަތު ދޭން ނިންމައިފި އެވެ.
އެ މައްސަލާގައި މިއަދު ބޭއްވި ކޮމެޓީގެ ބައްދަލުވުމުގައި ވަނީ ގަވަރުނަރު ޖަވާބުދާރީވުމަށް މި މަހުގެ 15 ގައި ހާޒިރުކުރަން ފާސްކޮށްފަ އެވެ. އަދި ގަވަރުނަރުގެ އަރިހުން ކަަމަކަށް އެދިގެން އެއްބާރުލުން ނުދެއްވާ އޮތްތޯ ބެލުމަށް ފިނޭންސް މިނިސްޓަރަށް ސިޓީއެއް ފޮނުވަން ވެސް ކޮމެޓީން ފާސްކޮށްފައިވެ އެވެ.
އަލީ ހާޝިމް ގަވަރުނަރުކަމުން ވަކިކުރަން ހުށަހެޅުއްވީ ދިއްގަރު ދާއިރާގެ މެންބަރު އަދި މަޖިލީހުގެ ނައިބު ރައީސް އަހުމަދު ނާޒިމެވެ. އޭނަ ވިދާޅުވީ ބެންކުތަކާއި ފައިނޭންޝަލް އިންސްޓިޓިއުޝަންތަކުން އާންމުންނަށް ލޯނު ދޫކުރާވަރު ނުސީދާކޮށް ހިފަހައްޓައި ބެންކުތަކުގެ ރިޒާވް އެމްއެމްއޭގައި ބެހެއްޓުމަށް ގަވަރުނަރު ބާރު އަޅާ ކަމަށާއި އޭގެ ސަބަބުން އިގުތިސާދުގެ ތެރޭގައި ދައުރުވާން ހުރި ފައިސާ މަދުވެ، އިގުތިސާދީ މަސައްކަތްތައް ހުއްޓި އިގުތިސާދުގެ ދުވެލި މަޑުޖެހެމުންދާ މަަށެވެ.
ނާޒިމު ވިދާޅުވެފައި ވަނީ ގަވަރުނަރު މަގާމުގެ މަސްއޫލިއްޔަތު ވެސް އަދާނުކުރައްވާ ކަމަށާއިި ސަރުކާރަށް ދޭން ޖެހޭ ލަފާ ދެއްވަމުން ނުގެންދަވާ ކަމަށެވެ.
ކުރީގެ ރައީސް މުހައްމަދު ނަޝީދުގެ ވެރިކަމުގައި ފިނޭންސް މިނިސްޓަރުކަން ކުރެއްވި އަލީ ހާޝިމް ގަވަރުނަރު ކަމަށް އައްޔަންކުރީ ސެޕްޓެމްބަރު 8، 2019 ގަ އެވެ.