ބޮލީވުޑްގެ ބަތަލާ ސޮނާކްޝީ ސިންހާގެ ކައިވެނީގެ ހަފުލާ ބޭއްވިތާ ދެ ދުވަސް ފަހުން އޭނަގެ ބައްޕަ ޝަތުރުގަން ސިންހާ ހޮސްޕިޓަލްގައި އެޑްމިޓްކޮށްފައި ވަނިކޮށް، ސޮނާކްޝީ ފިރިމީހާއާ އެކީ ހަނީމޫނަށް ހިނގައްޖެ އެވެ.
ފިރިމީހާ ޒަހީރު އިގްބާލާ އެކީ ހަނީމޫން ދަތުރުގެ ފޮޓޯތަކެއް ވެސް ސޮނާކްޝީގެ އިންސްޓަގްރާމް ސްޓޯރީގައި މިއަދު ޕޯސްޓްކޮށްފައިވެ އެވެ. އެ ފޮޓޯތަކުގައި ފެންނަނީ އުސް އިމާރާތެއްގެ ޕޫލެއްގެ ތެރޭގައި ދެ މީހުން ތިބޭ ތަނާއި ރެސްޓޯރަންޓެއްގައި ކާ ތަނެވެ.
ސޮނާކްޝީ އާއި ޒަހީރު ކައިވެނިކުރީ މިދިޔަ މަހުގެ 23 ގަ އެވެ. އެ ކައިވެނީގެ ހަފުލާގައި ސޮނާކްޝީގެ ބައްޕަ ސަތަރޭ ވަރަށް ހަރަކާތްތެރިކޮށް އުޅުނެވެ. ކައިވެނި ހަފުލާ ބޭއްވިތާ ދެ ދުވަސް ފަހުން އޭނަ އެޑްމިޓްކުރީ މުމްބާއީގެ ކޮކީލާބެން ދިރުބާއީ އަމްބާނީ ހޮސްޕިޓަލްގަ އެވެ.
View this post on Instagram
މިކަމާ ބެހޭ ގޮތުން ސަތަރޭ، 77، ގެ އެއްމާބަނޑު ދެ ފިރިހެން ކުދިންގެ ތެރޭގައި ހިމެނޭ ލަވް ސިންހާ، އިންޑިއަން އެކްސްޕްރެސް އަށް ބުނެފައި ވަނީ ބައްޕަ އެޑްމިޓްކުރީ ވައިރަލް ހުމެއްގެ ސަބަބުން ކަމަށެވެ. އަދި އޭނަގެ ސިއްހީ ހާލަތާ މެދު ކަންބޮޑުވާން ޖެހޭ ވަރުގެ ކަމެއް ނެތް ކަމަށް ބުންޏެވެ.
ސޮނާކްޝީ އަކީ ސަތަރޭގެ ތިން ކުދިންގެ ތެރެއިން ހަމައެކަނި އަންހެން ދަރިފުޅެވެ.