އަންނަ ހުކުރު ދުވަހު ރިލީޒްކުރަން އޮތް އަޖޭ ދޭވްގަނާއި ތައްބޫގެ އާ ފިލްމު "އޯރޯ މޭ ކަހާ ދަމް ތާ" ރިލީޒްކުރުން ފަސްކޮށްފި އެވެ.
އެކަން އިއުލާންކޮށް ފިލްމުގެ ޓީމުން ރޭ ނެރުނު ނޯޓިހެއްގައި ބުނީ ފިލްމު ފަސްކުރަން ނިންމީ އޭގެ އެގްޒިބިޓަރުންނާއި ޑިސްޓްރިބިއުޓަރުންގެ އެދުމުގެ މަތިން ކަމަށެވެ. އެހެންވެ "އޯރޯ މޭ ކަހާ ދަމް ތާ" ބެލުންތެރިންނަށް ގެނެސްދޭނެ އާ ތާރީހެއް ފަހުން އިއުލާން ކުރާނެ ކަމަށް ބުންޏެވެ.
މި އަހަރުގެ އެންމެ އުންމީދީ ފިލްމުތަކުގެ ތެރޭގައި ހިމެނޭ ފިލްމަކީ ނީރަޖް ޕާންޑޭ ޑައިރެކްޓްކޮށްފައިވާ އަސަރު ގަދަ ލޯބީގެ ފިލްމެކެވެ. "އޯރޯ މޭ ކަހާ ދަމް ތާ" ގެ ކާސްޓްގައި ޖިމީ ޝެރްގިލް އާއި ޒުވާން ތަރިން ކަމަށްވާ ސައީ މަންޖްރޭކަރާއި ޝަންތަނޫ މަހޭޝްވަރީ ހިމެނެ އެވެ.
މި ފިލްމަކީ އަޖޭ އާއި ތައްބޫ އެކީގައި ކުޅުނު 13 ވަނަ ފިލްމެވެ.
އަޖޭގެ ދެ ފިލްމެއް މި އަހަރުގެ މިހާތަނަށް ރިލީޒްކޮށްފައިވެ އެވެ. އެއީ މާޗްގައި ގެނެސްދިން "ޝައިތާން" އާއި އެޕްރީލްގައި ރިލީޒްކުރި "މައިދާން" އެވެ. އަދި މި އަހަރުގެ ނޮވެމްބަރުގައި އޭނަގެ "ސިންގަމް އެގެއިން" ސިނަމާތަކަށް އަންނާނެ އެވެ.
"އޯރޯ މޭ ކަހާ ދަމް" ހުކުރު ދުވަހު ސިނަމާތަކަށް ނުގެންނަން ނިންމި އިރު، އެ ދުވަހު ރިލީޒްކުރަން އޮތް ފާހަގަކޮށްލެވޭ ފިލްމަކީ ކަރަން ޖޯހަރްގެ ދަރުމާ ޕްރޮޑަކްޝަންގެ އެކްޝަން ތުރިލާ "ކިލް" އެވެ. އިންޑިއާގެ އެންމެ އަނިޔާވެރި ފިލްމުގެ ގޮތުގައި ޕްރޮމޯޓްކުރަން އަންނަ މި ފިލްމަކީ ނިކިލް ނާގޭޝް ބަޓް ޑައިރެކްޓްކޮށް، އާ އެކްޓަރު ލަކްޝް ލަލްވާނީ ތައާރަފުކުރާ ފިލްމެވެ.