މި ސިޔާސީ މަގާމުތަކުގައި ތިބި މީހުންގެ އަދަދު ހާމަކުރަން ގޮވާލާ މަޖިލީހަށް ހުށަހެޅި ކުއްލި މައްސަލަ ބޭރުކޮށްލުމާ ގުޅިގެން އެމްޑީޕީގެ ޗެއާޕާސަން އެކަމަށް ފާޑު ވިދާޅުވެއްޖެ އެވެ.
އެމްޑީޕީ އަށް ނިސްބަތްވާ ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމު ހުށަހެޅުއްވި ކުއްލި މައްސަލަ މިއަދު ބޭރުކޮށްލުމާ ގުޅިގެން ފައްޔާޒު ވިދާޅުވީ އެކަން އެގޮތަށް ކުރީ ސިޔާސީ މަގާމުތަކުގެ އަދަދު އިންތިހާ އަށް އިތުރުވެ ދައުލަތުގެ ހަރަދު ނުތަކާ ވަރަށް ދިއުމުން ކަމަށެވެ.
އޭނަ ވިދާޅުވީ ކުއްލި މައްސަލަ ބޭރުކޮށްލީ ރިޔާސީ އިންތިހާބުގައި ރައީސް ޑރ. މުހައްމަދު މުއިއްޒު ވެވަޑައިގެންނެވި ރިޔާސީ ވައުދާ ވެސް ހިލާފަށް ކަމަށެވެ. އަދި ސިޔާސީ މަގާމުތަކަށް އައްޔަންކޮށްފައި ތިބި މީހުންގެ އަދަދު މި ސަރުކާރުން ސިއްރު ކުރަނީ އެ އަދަދު މަތިކަމުން ކަމަށް ވިދާޅުވި އެވެ.
"ގައުމުގެ އިގުތިސާދު މިދާ މިސްރާބަކީ އިގްތިސާދު މެނޭޖުކުރަން މި ސަރުކާރަށް ނޭނގި ރައްޔިތުންނަށް ކަންކަން އޮޅުވާލާ ދޮގު ހެދުމުގެ ސަބަބުން ކުރިމަތިވާ ކަމެއް މިއީ." ފައްޔާޒު ވިދާޅުވި އެވެ.
ނަމަވެސް މި ސަރުކާރު ވެރިކަމަށް އައީ ދެފުށް ފެންނަ ގޮތަށް ހުރިހާ ކަމެއް ވެސް ކުރާނެ ކަމަށާއި އެއްވެސް ކަމެއް ނުފޮރުވާނެ ކަމަށް ބުނެ ވައުދުވަމުންކަން ފައްޔާޒު ފާހަގަކުރެއްވި އެވެ.
މީކާއިލް ހުށައެޅި ގަރާރުގައި ވަނީ ސިޔާސީ މަގާމުތަކުގައި މުވައްޒަފުބް ތިބި އަދަދާއި ސަރުކާރު ހިއްސާވާ ކުންފުނިތަކުން މުސާރާގެ ގޮތުގައި ހޭދަކުރަމުންދާ މިންވަރު ހާމަކުރަން ގޮވާލައިފަ އެވެ.
މި ސަރުކާރުން އައި އިރު ބުނެފައި ވަނީ ސިޔާސީ މަގާމުތައް 700 އަށް ވުރެ އިތުރު ނުވާނެ ކަމަށެވެ. ނަމަވެސް އިދިކޮޅު އެމްޑީޕީން ބުނާ ގޮތުގައި އެ އަދަދު މިހާރު 2،000 އަށް ވުރެ ގިނަ އެވެ. އެކަމަކު ސަރުކާރަށް ނިސްބަތްވާ މަޖިލިސް މެންބަރުން ވިދާޅުވާ ގޮތުގައި ސިޔާސީ މަގާމުތައް އަދިވެސް ހުރީ 700 އިން ދަށުގަ އެވެ.