'އަނިޔާވެރިކަމާއި ދެކޮޅަށް' ދިވެހިން ނަމުގައި އިދިކޮޅު ފަރާތްތަކުން ހިންގާ ހަރަކާތް ތަކުގައި އެންމެ އިސްކޮށް ހަރަކާތްތެރިވެ ވަޑައިގަންނަވާ އަދާލަތު ޕާޓީގެ ރައީސް ޝެއިޚް އިމްރާން އަބްދުﷲ އަށް ސަރުކާރުގެ އިސްވެރިން ދަނީ ތަފާތު ގޮތްގޮތުން ފާޑު ކިޔަމުންނެވެ.
މިކަން އެންމެ ބޮޑަށް ފާހަގަ ވެގެން ދިޔައީ އައްޑޫ ސިޓީގެ އިސްމެހެލާ ހެރަ ރިސޯޓަކަށް ހެދުމުގެ ޕްރޮޖެކްޓް އިފްތިތާޙްކުރުމަށް ބޭއްވި ރަސްމިއްޔާތުގެ ތެރޭގައެވެ. އެ ރަސްމިއްޔާތުގެ ތެރޭގައި އިސްމެހެލާ ހެރައިގެ ނަން ބޭނުން ކުރެވުނު ވަރަށް ވުރެ ގިނައިން ޕީޕީއެމްގެ މެންބަރުން ވަނީ 'އިމްރާން' އޭ ވިދާޅުވެފައެވެ.
އެހެންކަމުން އެ ރޭ ސަރުކާރުން ބޭއްވީ ޝެއިޚް އިމްރާން އަށް ފާޑުކިޔުމުގެ ރަސްމިއްޔާތަކޭ ދެންނެވުން ގޯހަކަށް ނުވާނެއެވެ.
އެރޭގެ ރަސްމިއްޔާތުގައި އިސްމެހެލާ ހެރަ ރިސޯޓުގެ ޕްރޮޖެކްޓްގެ ތަފްސީލްތައް ދެއްވުމުގެ ބަދަލުގައި ރައީސް ޔާމީން ވެސް ފެއްޓެވީ 'ޝެއިޚް އިމްރާންގެ މައުޟޫ' އަށް ވާހަކަ ދެއްކެވުމަށެވެ.އިމްރާން ކުރައްވާ މަސައްކަތުން އެއްވެސް ދިރުމެއް ނުފެންނަ ކަމަށާއި “ހޭބުއްދި” ހުރި މީހަކަށް އިމްރާން އެ ދައްކަވާ ވާހަކަތަށް ނުވިސްނޭނެ ވާހަކައެވެ. އަދި އެބޭފުޅާގެ ފަރާތުން އިމްރާން އާއި ވާހަކަ ދައްކާނީ ޓޫރިޒަމް މިނިސްޓަރ އަދީބު ކަމަށެވެ.
ތިމަން މަނިކުފާނުގެ ފަހަތުގައި 'އިސްމެހެލާ ރިސޯޓު' ގެ ބަދަލުގައި އޮތީ 'ޝެއިޚް އިމްރާން' އޭ ރައީސް އަށް ހީފުޅުވީ ކަމަށް ވެސް ވެދާނެއެވެ.
“ރައިސުލް ޖުމްހޫރިއްޔާ ނުގެންދެވޭނެ އިމްރާނުގެ މޭޒަކަށް. ވަރަށް ސާބިތުކަމާއެކު މި ދަންނަވަނީ ރާއްޖޭގެ މިހާރުގެ ރައީސުލްޖުމްހޫރިއްޔާ އަބުދުﷲ ޔާމިން އަބުދުލްޤައްޔޫމް، އިމްރާނުގެ މޭޒަކަށް ނުގެންދެވޭނެ.” ހޮޓެލް ޖެންގައި ބޭއްވި ރަސްމިއްޔާތުގައި 'ޝެއިޚް އިމްރާންގެ މައުޟޫ' އަށް ވާހަކަ ދެއްކެވި ވިލިމާލެ ދާއިރާގެ މަޖިލިސް މެންބަރ ނިހާން ވިދާޅުވިއެވެ.
އަޅުގަނޑުމެން އައްޑޫ ސިޓީގެ ހުޅުދޫ ދާއިރާގެ މެންބަރު މުހައްމަދު ޝާހިދު ތޯއެވެ. ޓީވީ އިން އެ ރަސްމިއްޔާތު ބަލަމުން ދިޔަ އައްޑޫގެ ރައްޔިތުން ހީކުރި ގޮތާ ޚިލާފަށް ޝާހިދު ވެސް ވާހަކަ ދައްކަވަން ފެއްޓެވީ ހަމަ "ޝެއިޚް އިމްރާން މައުޟޫ' އަށެވެ.
ނަޝީދު އަވަހާރަކޮށްލަން އިމްރާން ދީނީ ރައުޔެއް ދެއްވި ކަމަށް ބުނެ ނޫސްތަކުގެ ފަލަ ސުރުޚީ ތަކުން އޭނާ ވެސް ޖާގަ ހޯއްދެވިއެވެ. މެޑަމް ފާތުން އާއި ރައީސް ޔާމީންގެ އިތުރުން އަދީބް ވެސް ހެއްވާލެވުނެވެ. އެކަމަކު އައްޑޫގެ ރައްޔިތުން ތިބީ އިސްމެހެލާ ހެރައިގެ ވާހަކަ ނުދެއްކުމުން ކަންބޮޑުވެފައެވެ.
އެންމެ ބާރުގަދަ ކަމަށް ބުނާ ޓޫރިޒަމް މިނިސްޓަރ އަދީބު އަށް ވެސް ހިފަހައްޓައެއް ނުލެވުނެވެ. ރަކި ހިނިތުންވުމަކާއި އެކު މެޑަމް ފާތުންގެ ނަން ވިދާޅުވެ ފެއްޓެވި އަދީބު އަށް ވެސް އިސްމެހެލާ ޕްރޮޖެކްޓުގެ ވާހަކަ ދެއްކުން އެހާ މުހިއްމެއް ނުވިއެވެ. ތިމަންނާ އަކީ ދީނީ ގޮތުން އެހާ އުސްމިންތަކަށް ދެވިފައި ނެތް މީހެއް ކަމަށް އަމިއްލަ އަށް އެއްބަސްވި ނަމަވެސް ޤިޔާމަތް ކައިރިވުމުން މުނާފިޤު އިލްމުވެރިން ފާޅުވާނެ ކަމަށް ޤުރުއާނުގައި ވެސް އައިސްފައިވާ ކަމަށް ވިދާޅުވެ ރާއްޖޭގެ ދީނީ އިލްމުވެރިންނަށް މަލާމާތް ރައްދުވާގޮތަށް ވާހަކަ ދެއްކެވިއެވެ.
ރައީސް ޔާމީން ވިދާޅުވަމުން ގެންދަވަނީ ޝެއިޚް އިމްރާންގެ ކުރައްވާ މަސައްކަތުން އެއްވެސް ދިރުމެއް ނުފެންނަ ކަމަށެވެ. އެހެން ނަމަވެސް ސަރުކާރުގެ ވެރިންގެ ފަރާތުން ފެންނަމުން ދަނީ ހޭބޯނާރާ 'ޝެއިޚް އިމްރާންގެ މައުޟޫ' އަށް ވާހަކަ ދައްކަވާ މަންޒަރެވެ.
އުފެދޭ ސުވާލަކީ ރައީސް ޔާމީން ވިދާޅުވާފަދަ 'ދިރުމެއް ނުފެންނަ' މަސައްކަތް ކުރައްވާ ބޭފުޅަކު އިމިގްރޭޝަނަށް ހާޒިރު ކުރާނަމޭ ، މަޖިލީހަށް ހާޒިރު ކުރާނަމޭ ބުނެ ބިރު ދައްކަނީ ޝެއިޚް އިމްރާން ދެކެ ސަރުކާރުން ޖެހިލުން ވާތީ ހެއްޔެވެ ؟