އިސްލާމިކް މިނިސްޓްރީން ސިލްސިލާކޮށް ބާއްވަން ފެށި އިސްލާމީ އަޤީދާއާ ބެހޭ ޢިލްމީ ދެވަނަ ދައުރާގައި ބައިވެރިވުމުގެ ފުރުސަތު ހުޅުވާލައިފި އެވެ.
މި ދައުރާ ބާއްވާން ހަމަޖެހިފައި ވަނީ މި މަހުގެ 9 އާއި 10 ގައި އިސްލާމީ މަރުކަޒުގަ އެވެ.
އިސްލާމިކް މިނިސްޓްރީ އާއި ސުޢޫދީ އަރަބިއްޔާގެ އިސްލާމީ ކަންތައްތަކާއި އައުޤާފާ ބެހޭ ވުޒާރާއާ ގުޅިގެން ދައުރާގައި ސައުދީގެ ދީނީ އިލްމުވެތިން ބައިވެރިވެވަޑައިގެން، ދަންފަޅިތައް ނަންގަވައި ދެއްވާނެ އެވެ. ދައުރާގައި މަޢުލޫމާތު ދޭނީ ޢަރަބި ބަހުންނެވެ.
މި ސިލްސިލާގެ ފުރަތަމަ ދައުރާ ބޭއްވީ މެއި 20-21 ގަ އެވެ. އޭގައި ވެސް އެކި އުމުރުފުރާގެ ގިނަ އަދަދެއްގެ ބަޔަކު ބައިވެރިވި އެވެ.
ދައުރާއާ ބެހޭ ގޮތުން މިނިސްޓަރު ޑރ. މުޙައްމަދު ޝަހީމް އަލީ ސަޢީދު ވިދާޅުވެފައި ވަނީ މިފަދަ މަސައްކަތްތަކަކީ އެ އެ މިނިސްޓްރީ އާއި ސައުދީ ސަރުކާރާ ދެމެދު ވެވިފައިވާ އެއްބަސްވުމެއްގެ ދަށުން ކުރިއަށް ގެންދެވޭ މަސައްކަތެއް ކަމަށެވެ. އެގޮތުން ކުރިއަށް ޢިލްމީ އެކި މަސައްކަތްތައް ކުރިއަށް ގެންދިއުމާއި، އެކި ދިރާސާ ކުރުމުގެ އިތުރަށް އިސްލާމީ ޚިދުމަތުގައި އެކި މަސައްކަތްތައް ކުރިއަށްގެންދާ ގޮތަށް ހަމަޖެހިފައިވާ ކަމަށް ވިދާޅުވި އެވެ.