އެމްޑީޕީން އުޅެނީ ރައްޔިތުންގެ މަޖިލީހުގެ ވަގުތު ބޭކާރު ކުރަން ކަމަށް ހިތަދޫ މެދު ދާއިރާގެ މެމްބަރު އަހުމަދު އަޒާން ވިދާޅުވެއްޖެ އެވެ.
އަޒާން މިހެން ވިދާޅުވެފައިވަނީ މި ސަރުކާރުން ސިޔާސީ މަގާމުތަކަށް އައްޔަނުކޮށްފައިވާ މީހުންގެ އަދަދާއި ސަރުކާރު ކުންފުނިތަކުން މުސާރައިގެ ގޮތުގައި ހޭދަކުރަމުންދާ އަދަދު ހާމަކުރުމަށް ސަރުކާރަށް ގޮވާލާ ރައްޔިތުންގެ މަޖިލީހުގެ އިއްޔެގެ ޖަލްސާއަށް ހުށަހެޅި ކުއްލި މައްސަލަ ބޭރުކޮށްލަން އަޒާން ވޯޓު ދީފައިވާތީ ބައެއް ފަރާތްތަކުގެ ފާޑުކިޔުން އަމާޒުވެފައިވާ ދަނޑިވަޅެއްގަ އެވެ.
ކުރިން ނޫސްވެރިއެއްގެ ގޮތުގައި މަސައްކަތް ކުރިއިރު މައުލޫމާތުތައް ހާމަކުރުމަށް ކުރީ ސަރުކާރަށް އެންމެ ބޮޑަށް ޕްރެޝަރު ކުރި އެކަކީ އަޒާން ކަމަށްވާއިރު، އޭނާ މިއަދު ވިދާޅުވީ އިއްޔެ ވޯޓު ދިނީ އެމްޑީޕީން މަޖިލީހުގެ ވަގުތު ބޭކާރު ކުރަން ހުށަހެޅި މައްސަލައަކަށް ކަމަށާއި މައުލޫމާތު ހާމަކުރުމާއި ދެކޮޅަކަށް ނޫން ކަމަށެވެ.
"ސިޔާސީ މުވައްޒަފުންގެ އަދަދު ސަރުކާރުން ހާމަކުރާނެ. ރައީސް މުއިއްޒު ވަނީ އެކަން ކުރުމަށް ކަމާ ބެހޭ އިދާރާތަކަށް އަންގަވާފައި،" އަޒާން ވިދާޅުވި އެވެ.
މި ކުއްލި މައްސަލަ އިއްޔެގެ ޖަލްސާއަށް ހުށަހެޅުއްވީ އިދިކޮޅު އެމްޑީޕީއަށް ނިސްބަތްވާ ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމެވެ.
އެ ކުއްލި މައްސަލައަށް ބަހުސްކުރަން ނެގި ވޯޓުގައި މައްސަލަ ބަލައިގަތުމަށް ވޯޓު ދެއްވީ އެންމެ 11 މެންބަރުންނެވެ. އެ މައްސަލަ ބަލައިނުގަތުމަށް 56 މެންބަރުން ވަނީ ވޯޓުދެއްވާފަ އެވެ. އެއާއެކު އެ ކުއްލި މައްސަލަ ވަނީ މަޖިލީހުން ބޭރުކޮށްލާފަ އެވެ.