މޫސުމަށް އަންނަ ބަދަލުތަކުން ކުރާ އަސަރު ކުޑަކުރުމާއި، އިންސާނީ ޙައްޤުތައް ކުރިއެރުވުމަށް ކުރާ މަސައްކަތުގައި އެމެރިކާއަކީ ރާއްޖޭގެ ދެމެހެއްޓެނިވި ބައިވެރިއެއް ކަމަށް ފޮރިން މިނިސްޓަރު މޫސާ ޒަމީރު ވިދާޅުވެއްޖެ އެވެ.
ޒަމީރު މިހެން ވިދާޅުވީ އެމެރިކާގެ މިނިވަން ދުވަހުގެ މުނާސަބަތުގައި އެޤައުމުގެ ޚާރިޖީ ވަޒީރު، އެންތަނީ ބްލިންކަން އަށް ފޮނުއްވި ތަހުނިޔާގެ މެސެޖެއްގަ އެވެ.
މި މެސެޖުގައި ޒަމީރު ވިދާޅުވީ އެމެރިކާގެ މިނިވަން ދުވަހުގެ މުނާސަބަތުގައި އެމެރިކާގެ ރައްޔިތުންނަށް ދިވެހި ސަރުކާރާއި ދިވެހި ރައްޔިތުންނަށް ނަމުގައި، ތަހުނިޔާ ފޮނުވުމަކީ ލިބޭ ވަރަށް ބޮޑު އުފަލެއް ކަމަށެވެ.
މޫސުމަށް އަންނަ ބަދަލުތަކުން ކުރާ އަސަރު ކުޑަކުރުމާއި، އިންސާނީ ޙައްޤުތައް ކުރިއެރުވުމަށާއި، ޑިމޮކްރެޓިކް މުއައްސަސާތައް ހަރުދަނާކުރުމަށް ކުރަމުންދާ މަސައްކަތުގައި އެމެރިކާއަކީ ރާއްޖޭގެ ދެމެހެއްޓެނިވި ބައިވެރިއެއް ކަމަށާއި ފާއިތުވި އަހަރުތަކުގައި ރާއްޖެއާއި އެމެރިކާގައި ރެސިޑެންޓް އެމްބަސީތައް ހުޅުވުމާއެކު އެމެރިކާއާއެކު އޮންނަ ގުޅުން ވަރަށް ބޮޑަށް ފުޅާވެފައިވާ ކަމަށް ޒަމީރު ވިދާޅުވި އެވެ.
މީގެއިތުރުން އުންމީދަކީ ކުރިއަށް އޮތް ތަނުގައި މިގުޅުން އިތުރަށް ބަދަހިވެގެންދިޔުން ކަމަށްވެސް ޒަމީރުގެ މެސެޖުގައި ވިދާޅުވެފައިވެ އެވެ.