މި އަހަރުގެ "ފިއުޗަ ޔޫތު އެކްޝަން ޑޭސް ސަމިޓް" ގައި ބައިވެރިވުމުގެ ފުރުސަތު ރާއްޖޭގެ 10 ޒުވާނަކަށް ހުޅުވާލައިފިއެވެ.
"ފިއުޗަ ޔޫތު އެކްޝަން ޑޭސް" ހާއްސަކޮށްފައި ވަނީ އުމުރުން 18-30 އަހަރާ ދެމެދުގެ ޒުވާނުންނަށެވެ. އޭގައި ބައިވެރިވުމުގެ ފުރުސަތު ހުޅުވާލާފައި ވަނީ މި މަހުގެ 10 އާ ހަމައަށެވެ. މި ސަމިޓްގެ ހުރިހާ ހަރަދެއް އދ. އިން ދޭން ހަމަޖެހިފައވެ އެވެ.
މިއީ ތަފާތު ސްޓޭކްހޯލްޑަރުން އެއްތަނަކަށް ގެނެސް، ރަނގަޅު މުސްތަގުބަލަކަށް ދެމެހެއްޓެނިވި ހައްލުތަކެއް ހޯދުމުގެ މަގްސަދުގައި ދެ ދުވަހުގެ މުއްދަތަށް ކުރިއަށް ގެންދާ ސަމިޓެކެވެ. މި އަހަރުގެ ސަމިޓް އޮންނާނީ ސެޕްޓެމްބަރު މަހުގެ 20 އާއި 21 ގައި ނިއުޔޯކްގައި ހުންނަ އދ.ގެ މައި މަރުކަޒުގަ އެވެ.
"ފިއުޗަ ޔޫތު އެކްޝަން ޑޭސް" ގެ މަގުސަދަކީ ސަރުކާރުތަކާއި، މަދަނީ ޖަމިއްޔާތަކާއި، ވިޔަފާރިތަކާއި، ޒުވާނުންނާއި އަދި އެ ނޫން ވެސް ފަރާތްތަކުގެ މެދުގައި ގުޅުން ބަދަހިކުރުމެވެ. މީގެއިތުރުން، މުހިންމު ކަންކަމުގައި ހަރުދަނާ ފިޔަވަޅުތަކާ އެކު، މިހާރު ކުރިއަށްދާ މަސައްކަތްތައް އިތުރަށް ފުޅާކޮށް، ސަމިޓަށް ދެމެހެއްޓެނިވި ކުރިއެރުމެއް ހޯދައިދިނުމަށް ގަދައަޅާ މަސައްކަތް ކުރުން ވެސް ހިމެނެ އެވެ.
ސަމިޓަށް ބައިވެރިން ހޮވާނީ އދ. ގެ ޔޫތު އޮފީހާއި، ޒުވާނުންގެ ޖަމިއްޔާތަކާއި، ކުރީގެ އެޑްވޮކަސީ ގްރޫޕްތައް ތަމްސީލުކުރާ ކޮމިޓީއަކުންނެވެ.