ބޮލީވުޑްގެ މަގުބޫލު "ރޭސް" ފްރެންޗައިޒްގެ ހަތަރު ވަނަ ބައިގެ ކާސްޓްގައި ފުރަތަމަ ދެ ބައިގައި އެންމެ މުހިއްމު ރޯލެއް ކުޅުނު ސައިފް އަލީ ޚާން ހިމެނޭނެ ކަމަށާއި އާ ފިލްމު ޑައިރެކްޓްކުރާނީ ނިކިލް އަދުވާނީ ކަމަށް ރިޕޯޓްތައް ބުނެފި އެވެ.
ފިލްމުފެެއާ މިއަދު ބުނީ "ރޭސް 4" ގެ ކާސްޓްގައި ސައިފް ހިމެނޭނަކަން ގާތްގަނޑަކަށް ކަށަވަރު ކަމަށާއި އޭނަ އަކީ ޒުވާން އާ ކާސްޓެއް ފިލްމުގައި ހިމެނޭނެ ކަމަށެވެ
މީގެ ހަފުތާއެއްހާ ދުވަސް ކުރިން ޕްރޮޑިއުސަރު ރަމޭޝް ތައުރާނީ ވަނީ ފިލްމުގެ ސްކްރިޕްޓް ނިމިފައި އޮތް ކަމަށާއި ވަރަށް އަވަހަށް ފިލްމު ރަސްމީކޮށް އިއުލާން ކުރާނެ ކަމަށެވެ. އޭނަ ވެސް ބުނީ ފިލްމުން އާ ކާސްޓެއް ފެންނާނެ ކަމަށެވެ. އެކަމަކު ޑައިރެކްޓްކުރާނީ ކާކު ކަމެއް ނުބުނެ އެވެ.
ފިލްމުފެއާ އިން ބުނީ "ރޭސް 4" ޑައިރެކްޓްކުރަން ނިކިލްއާ މިހާރު ހަވާލުކޮށްފައިވާ ކަމަށެވެ. އެހެންވެ މި ފިލްމު ވާނީ ސައިފް ހިމަނައިގެން އޭނަ ފިލްމެއް ޑައިރެކްޓްކުރާ ފުރަތަމަ ފިލްމަށެވެ. ނިކިލް ޕްރޮޑިއުސްކުރި ފިލްމެއް ސައިފް ކުޅެފައިވެ އެވެ. އެއީ 2018 ގެ ފައިނޭންޝަން ތުރިލާ އެވެ.
ނިކިލްގެ ކުރިއަށް އޮތް ފިލްމަކީ ޖޯން އަބްރަހަމާ އެކީ އަންނަ މަހުގެ 15 ގައި ގެނެސްދޭން ހަމަހެހިފައިވާ އެކްޝަން ތުރިލާ "ވޭދާ" އެވެ.
"ރޭސް" ގެ ފުރަތަމަ ދެ ފިލްމު ޑައިރެކްޓްކުރީ އައްބާސް-މަސްތާން އެވެ. އެގޮތުން "ރޭސް" 2008 ގައި ގެނެސްދިނުމަށް ފަހު، "ރޭސް 2" ރިލީޒްކުރީ 2013 އެވެ. ސަލްމާން ޚާން ލީޑްގައި ހިމެނޭ ގޮތަށް މުޅިން ތަފާތު ކާސްޓަކާ އެކީ 2018 ގައި "ރޭސް 3" ގެނެސްދިނީ ރެމޯ ޑި ސޫޒާ ޑައިރެކްޓްކޮށެވެ.
އެ ފިލްމަކީ ވަރަށް ގިނަ ބައެއްގެ ފާޑުކިޔުންތައް އަމާޒުވި އަދި ބޮކްސް އޮފީހުގައި ވެސް ވަރަށް ވަނދުކޮށް ދިޔަ ފިލްމެކެވެ. ސަބަބަކީ ކުރީގެ ދެ ބައިގައި ހުރި ކަހަލަ ޝައުގުވެރި އެތައް ކަމެއް ތިން ވަނަ ބައިގައި އުނިވެފައި ހުރުމެވެ.