އެމްޑީޕީ ސަރުކާރުން ނިންމި ގޮތަށް މަސް ކިލޯއެއްގެ އަގު 25ރ. އަށް ބޮޑުކޮށް ދޭން މި ސަރުކާރަށް ގޮވާލަން މަސްވެރިން ނުކުންނަން ކެންދޫ ދާއިރާގެ މަޖިލިސް މެންބަރު މައުރޫފް ޒާކިރު (މަޓޭ) ގޮވާލައްވައިފި އެވެ.
އެމްޑީޕީން ރޭ "ކުރީ ސަރުކާރު… ކުރީ ސަރުކާރު…" ގެ ނަމުގައި ދަނޑުކޮށި ޖަގަހައިގައި ބޭއްވި ޖަލްސާގައި އޭނަ ވިދާޅުވީ ރައީސް ޑރ. މުހައްމަދު މުއިއްޒުގެ ސަރުކާރަށް އަށް މަސް ދުވަސް ނުވަނީސް މަސްވެރިންނަށް ހިތި ބޭސް ބޯންދީފައިވާ ކަމަށެވެ. އެހެންވެ މަސްވެރިން މިހާރު ތިބީ މާޔޫސްވެފައި ކަމަށާއި އެ މީހުންނަށް ކުރެވުނު ކަންތަކާ މެދު ފިކުރުކޮށް ހެދުނީ ގޯހެއްކަން ފާހަގަކޮށް ކޮންމެ ދުވަހަކު އޭނާއަށް މަސްވެރިން ގުޅަމުންދާ ކަަމަށް މައުރޫފް ވިދާޅުވި އެވެ.
އަބަދު ވެސް މަސައްކަތްތެރިންގެ ހައްގުގައި އަޑު އުފުއްލަވާ މެންބަރު ވިދާޅުވީ ޅ. ފެލިވަރާއި ގއ. ކޫއްޑޫގެ އިތުރުން ރާއްޖޭގެ އެކި ހިސާބުތަކުގައި ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުން އައީ މަސް ފެކްޓްރީތަކާއި މަސް ރައްކާކުރާނެ ރަނގަޅު ތަންތަން ގާއިމުކުރަމުން ކަމަށެވެ. އަދި އެ މަސައްކަތާ އެކު ރައީސް އިބްރާހީމް މުހައްމަދު ސޯލިހުގެ ވެރިކަން ނިންމަވާލެއްލީ މަސް ކިލޯއެއްގެ އަގު 25ރ. އަށް ބޮޑުކޮށްފައި ކަމަށް ވިދާޅުވި އެވެ.
މައުރޫފު ވިދާޅުވީ އެމްޑީޕީ ސަރުކާރު ބަދަލުނުކުރި ނަމަ މަސްވެރިންނަށް ބޮޑު އަގު ލިބޭނެ ކަމަށެެވެ.
"ވެރިކަން އަޅުގަނޑުމެންނަށް ދިން ނަމަ، ދިވެހި ރައްޔިތުން އަޅުގަނޑުމެންނަށް ދިން ނަމަ މިއަދު ވެސް މަސް ކިލޯއެއް ހުންނާނީ 25 ރުފިޔާގައި." އޭނަ ވިދާޅުވި އެވެ.
މައުރޫފު ވިދާޅުވީ މަހުގެ އަގަށް އެމްޑީޕީގެ ސަރުކާރުން ބަދަލު ގެނައުމުން ދައުލަތަށް ގެއްލުންވާ ކަމަށް ބުނެ މި ސަރުކާރުން ވާހަކަ ދައްކަނީ ހަގީގަތް އޮޅުވައިލަން ކަމަށެވެ. އަދި ކުރީގެ ސަރުކާރުން އެ ކަން ކުރީ ހިސާބު ޖަހައި އެކަން ވާނެ ގޮތުގެ މުޅި ޕްލޭނާ އެކީގައި ކަމަށް ވިދާޅުވި އެވެ.
އެހެންވެ ކެިލޯއެއްގެ އަގަށް މި ސަރުކާރުން ގެނައި ދަށް ބަދަލާ ދެކޮޅު ހަދައި، މަސް ކިލޯއެއްގެ އަގު އަލުން އަނބުރާ 25ރ. ރުފިޔާއަށް ބޮޑު ކުރަން މަސައްކަތް ފެށުމަށް މަސްވެރިންނަށް ގޮވާލެއްވި އެވެ.
"މަސްވެރިން އެ ތިބީ ރޯން. ހުރިހާ މަސްވެރިންނަށް އަޅުގަނޑު ގޮވާލަން ޔޫނިއަންތައް ހަދައިގެން ނިކުންނަން،" އޭނަ ވިދާޅުވި އެވެ. "ނިކުމެ މުޅި މަސްވެރިކަމުގެ ސިނާއަތު މަސްވެރިންގެ އަތް ދަށަށް ނަގައި، މަހުގެ އަގު އަލުން އަނބުރާ 25 ރުފިޔާއަށް ހަދަން މަސައްކަތް ކުރަން."
އެމްޑީޕީ ސަރުކާރުން މަސް ކިލޯއެއްގެ އަގު 17ރ. އިން 25ރ. އަށް ބޮޑުކުރީ މިދިޔަ އަހަރު ބޭއްވި ރިޔާސީ އިންތިހާބުގެ ދެވަނަ ބުރުގެ ކެމްޕޭން ތެރޭގަ އެވެ.
އެހެންވެ އެކަން މި ސަރުކާރުން ސިފަކޮށްފައި ވަނީ ސިޔާސީ ބޭނުމަށް ކުރި ވަރަށް ޒިންމާދާރުކަން ކުޑަކަމެއްގެ ގޮތުގަ އެވެ. މި ސަރުކާރުން މަސް ކިލޯއެއް ގަންނަ 20ރ. އަށް ވުރެ ދަށް ނުކުރަން ފެބްރުއަރީގައި ނިންމުމަށް ފަހު، މިދިޔަ ހަފުތާގައި ވަނީ ދެން މަސް ގަންނާނީ ބައިނަލްއަގުވާމީ ބާޒާރުގައި މަހުގެ އަގަށް އަންނަ ބަދަކަށް ރިއާޔަތްކުރުމަށް ފަހު އިއުލާންކޮށްފަ އެވެ.