މި އަހަރުގެ މިހާތަނަށް ދިވެހި ފަސް ފިލްމެއް އޮލިމްޕަހުގެ ބޮޑު ސްކްރީނަށް އައިސްފައިވެ އެވެ. އެންމެ ފަހުން އޮލިމްޕަހުުގައި ދެއްކީ މުހައްމަދު ނިޔާޒު (ޓެޑްރީ) ގެ "ލަސްވިޔަސް" އެވެ. މިދިޔަ މަހުގެ ތެރޭގައި ޝޯތައް ނިންމައިލި އެ ފިލްމު އޮލިމްޕަހުގައި ޕްރީމިއާކުރީ އެޕްރީލް 12 ގަ އެވެ.
މި އަހަރުގެ ފުރަތަމަ ފިލްމަކީ ޒުވާން ޑައިރެކްޓަރު އަޒްހާންގެ އިބްރާހީމް ފުރަތަމަ ފީޗާ ފިލްމު "މީ އިޝްގް" އެވެ. މި ފިލްމު ޕްރީމިއާކުރީ ޖެނުއަރީ 4 ގަ އެވެ. އޭގެ ފަހުން ފެބްރުއަރީ 1 ގައި އައި ފިލްމްސްގެ ބިރުވެރި ފިލްމު "ކަންބަޅި" ގެނެސްދިނެވެ. އަދި މާޗް މަހުގެ ތެރޭގައި އެކްޓަރު އަހުމަދު އާސިމްގެ ކުރު ފިލްމު "ހަދީޖާ" އޮލިމްޕުގައި ދެއްކުމަށް ފަހު، އެ މަހުގެ 4 ގައި ޑާކް އެންޓަޓައިންމަންޓްގެ ރިވެންޖް/އެކްޝަން ތުރިލާ "ފުރޭތަ" ބެލުންތެރިންނަށް ދޫކޮށްލި އެވެ.
އަހަރުގެ ބާކީ އޮތް މި އޮތް މުއްދަތުގެ ތެރޭގައި ވެސް ފުލުފުލުގައި ފިލްމުތަކެއް އަންނަން އެބަހުއްޓެވެ. އެއީ ކޮންކޮން ފިލްމުތަކެއްތޯ ބަލާލަމާ ހިނގާށެވެ.
* ސާޔާ
އަންނަ މަހު 7 ގައި ޕްރީމިއާކުރަން ތައްޔާރުވަމުން އަންނަ "ސާޔާ" އަކީ ލޯބީގެ ބިރުވެރި ފިލްމެކެވެ. ޔޫސުފް ޝަފީއު (ޔޫއްޕެ) ލިޔެ، ޑައިރެކްޓްކޮށްފައިވާ މި ފިލްމުގެ ރޯލަކުން ވެސް އޭނަ ފެންނާނެ އެވެ.
"ސާޔާ" ގެ ކާސްޓްގައި އައިމިނަތު ރަޝްފާ (އާޝާ) އިބްރާހީމް ޖިހާދު (ޖިމީ) ވެސް ހިމެނެ އެވެ.
* ކަމަނާ
މަހުދީ އަހުމަދު ސްކްރީންޕްލޭއަކަށް ހުސައިން މުނައްވަރު ޑައިރެޓްކޮށްފައިވާ "ކަމަނާ" ބެލުންތެރިންނަށް ދޫކޮށްލާނީ އަންނަ މަހުގެ 27 ގަ އެވެ.
މި ފިލްމުގެ ލީޑް ކާސްޓްގައި ޔޫއްޕެ، އާޝާ އަދި މަރިޔަމް އައްޒަ ހިމެނެ އެވެ.
* އުދަބާނި 2
މި ފިލްމަކީ ޑައިރެކްޓަރު އަމްޖަދު އިބްރާހީމް 2009 ގައި ގެނެސްދިން ކާމިޔާބު ބިރުވެރި ފިލްމު "އުދަބާނި" ގެ ދެވަނަ ބައެވެ. ލިޔުންތެރިޔާ މުހައްމަދު ގާސިމްފެ ވާހަކައަކަށް ހަދާފައިވާ "އުދަބާނި" އޮލިމްޕަހަށް ގެންނަން ނިންމާފައި ވަނީ ސެޕްޓެމްބަރު މަހުގެ 15 ގަ އެވެ.
މީގެ ކާސްޓްގައި އަހުމަދު އީސަ އާނަންދު، އައިމިނަތު ޝުހާ، އަލީ އާޒިމް (ދޮންއައްޔަ) އަދި ހާމިދު އަލީ ހިމެނެ އެވެ.
* ބިބީ
މި ހޮރޯ-ކޮމެޑީ އަކީ ޑާކް ރެއިން އެންޓައިންމަންޓުން ގެނެސްދޭ ފިލްމެކެވެ. އޮކްޓޯބަރު 7 ގައި ޕްރީމިއާކުރަން ތާވަލުކޮށްފައިވާ "ބިބީ" އަކީ އާ ޑައިރެކްޓަރު ޝަހުދާ މަހުމޫދު ލިޔެ، ޑައިރެކްޓްކޮށް ގެނެސްދޭ ފިލްމެކެވެ.
މީގެ ކާސްޓްގައި އޭނަގެ ފިރިމީހާ ޝަރަފު އަބްދުﷲ، މަރިޔަމް މަޖުދާ އަދި ޝީލާ ނަޖީބު ފަދަ ތަރިން ހިމެނެ އެވެ. "ބިބީ" ގެ ވަރަށް ހާއްސަ ފެނިލުމަކުން ކުރީގެ މަޝްހޫރު އެކްޓަރު އިސްމާއީލް ވަޖީހު ވެސް ފެންނާނެ އެވެ.
މި ފިލްމުތަކުގެ ފަހުން ނޮވެމްބަރު މަހާއި ޑިސެމްބަރުގައި އޮލިމްޕަހަށް އެއްވެސް ފިލްމެއް ގެންނާކަށް އަދި ހަމަޖެހިފައެއް ނެތެވެ.