ދޮޅު މިލިއަނެއްހާ ރުފިޔާގެ ވައްކަމަކާ ގުޅިގެން މީހަކު ހައްޔަރުކޮށްފި އެވެ.
އެ މައްސަލައިގައި ހައްޔަރުކޮށްފައި ވަނީ މީގެ ކުރިން ވެސް ކުށުގެ ރެކޯޑްތަކެއް އޮތް އއ. މަތިވެރި، ހަނދުވަރީގޭ އަބްދުﷲ ޖަމީލް، 33، އެވެ.
ޖަމީލު ހައްޔަރުކޮށް ބަންދާ މެދު ގޮތެއް ނިންމަން ކްރިމިނަލް ކޯޓަށް ހާޒިރުކުރުމުން ބަންދަށް 15 ދުވަސް ޖަހާފައިވެ އެވެ.
ކޯޓް އަމުރުގައިވާ ގޮތުން ދޮޅު މިލިއަނެއްހާ ރުފިޔާގެ ވައްކަމުގެ މައްސަލަ އަކީ އިންތިޒާމުވެގެން، ރާވައިގެން ގިނަ ބަޔަކު ޝާމިލުވެގެން ކޮށްފައިވާ ވައްކަމެވެ.
އެ މައްސަލައިގައި ޖަމީލްގެ މައްޗަށް ފުލުހުން ކުރާ ތުހުމަތުތަކަކީ ހުއްދަ ނޫން ތަނަކަށް ވަނުމާއި މުދަލަށް ގެއްލުން ދިނުމާއި ވައްކަން ކުރުމުގެ ތުހުމަތެވެ.
އޭނަގެ ރިކޯޑްތަކުން ދައްކާ ގޮތުގައި މަކަރާއި ހީލަތް ހެދުމުގެ މައްސަލައަކާއި ފޭކް ބޭންކް ސްލިޕެއް ހަދައިގެން ފިހާރައަކުން ވިޔަފާރި ކުރި މައްސަލައެއް ވެސް ހިމެނެ އެވެ. އެގޮތުން މިދިޔަ އަހަރު ފޭކް ސްލިޕް މުއާމަލާތާ ގުޅިގެން ޖަމީލަކީ އެއް އަހަރަށް ޖަލަށްލުމަށް ހުކުމް ވެސް ކޮށްފައިވާ މީހެކެވެ.
އަދި 2020 މަތިވެރި އަށް ބަނގުރާ ގެންދިޔަ މައްސަލައެއްގައި ވެސް އޭނަގެ މައްޗަށް ކުށް ސާބިތުވެފައިވެ އެވެ.