މިހާރު ކުރިއަށްދާ ޔޫރޯ ފުޓްބޯޅަ މުބާރާތާ ގުޅުވައިގެން އެމްޓީސީސީން "ފުޓްބޯޅަ ފޯރި" ގެ ނަމުގައި ހިންގަމުން އަންނަ ޕްރޮމޯޝަނާ ދިމާކޮށް ސްކޭމްތައް ހިންގާތީ ސަމާލުވުމަށް އެ ކުންފުނިން އިލްތިމާސްކޮށްފި އެވެ.
އެމްޓީސީސީން މިއަދު ބުނީ އެ ކުންފުނިން ސޯޝަލް މީޑިއާގައި ކުރިޔަށް ގެންދާ ޕްރޮމޯޝަންގައި ބައިވެރިވެފައިވާ ފަރާތްތަކަށް އޮޅުވާލައިގެން ސްކޭމެއް ކުރިއަށް ގެންދާކަން ފާހަގަކުރެވިފައިވާ ކަމަށެވެ. އެގޮތުން ޕްރޮމޯޝަންގައި ބައިވެރިވެފައިވާ މީހުންނަށް ވަކި ވަގުތެއްގެ ކުރިން ރަޖިސްޓަވާން ޖެހޭނެ ކަމަށް ބުނެ އެއްވެސް މެސެޖެއް ނުވަތަ ލިންކެއް ފޮނުވާފައިވާ ނަމަ އެކަމަށް ސަމާލުވުމަށް އިލްތިމާސްކޮށްފައިވެ އެވެ.
“މިފަދަ ސްކޭމެއްގައި ޖެހި ޕާސްވޯޑް ޖެހިފައިވާ ނަމަ އަވަހަށް ޕާސްވޯޑް ބަދަލުކުރެއްވުމަށް ދަންނަވަން. އިތުރު ރައްކާތެރި ކަމަށް އޯޓީޕީ އެއްވެސް ފަރާތަކާ ހިއްސާ ނުކުރުމަށާއި ޓޫފެކްޓަ އޯތެންޓިކޭޝަން އެކްޓިވޭޓްކޮށްފައި ބެހެއްޓުމަށް ހުރިހާ ބޭފުޅުންނަށް އިލްތިމާސްކުރަން." އެމްޓީސީސީން ބުންޏެވެ.
ރާއްޖޭގައި މި ފަހުން މަކަރާއި ހީލަތުން އޮޅުވާލައިގެން ފައިސާ ހޯދަން ހިންގާ މިފަދަ ސްކޭމްތައް ވަރަށް ބޮޑަށް އިތުރުވެފައިވެ އެވެ. އެހެންވެ އެކަމާ ދެކޮޅަށް މަސައްކަތް ކުރަން ފުލުހުން މިހާރު ވަނީ އެންޓި-ސްކޭމް ސެންޓަރެއް ވެސް ގާއިމުކޮށްފަ އެވެ.