ގައުމު ހަމަ މަގަށް އެޅުވޭނީ ވެރިން ޒިންމާދާރު ކުރުވައިގެން ކަމަށް ކުރީގެ ރައީސް އަބްދުﷲ ޔާމީން ވިދާޅުވެއްޖެ އެވެ.
ޙިޖުރީ ގޮތުން 1446 ވަނަ އަހަރު ފެށުމުގެ މުނާސަބަތުގައި ފޮނުއްވި މެސެޖެއްގައި ޔާމީން ވިދާޅުވީ ގައުމު ހަމަ މަގަށް އެޅުވޭނީ ވެރިން ޒިންމާދާރު ކުރުވައިގެން ކަމަށާއި ޕާޓިއަކަށް ސިޔާސީ ފިކުރަކަށް ނުބަލާ ނިކުމެ ހުރިހާ ރައްޔިތުންވެސް ސަރުކާރު ޖަވާބުދާރީ ކުރުވަން ޖެހޭ ކަމަށެވެ.
ސަރުކާރުގެ އަމަލުތަކަށް ފާރަވެރިވުމަށާއި ޤައުމީ މަޞްލަޙަތަށް ވުރެ އަމިއްލަ މަޞްލަޙަތު އިސްނުކުރުމަށް ވެސް ޔާމީން ވަނީ އިލްތިމާސްކުރައްވާފަ އެވެ.
މީގެއިތުރުން އިސްލާމީ އުއްމަތަށް މިއަދު ކުރިމަތިވެފައިވާ ގޮންޖެހުންތަކާއި ނުރައްކާތަކުގެ މަތިން މިއަދު ހަނދާންކުރަންޖެހޭ ކަމަށާއި ހައްސަކޮށް ފަލަސްތީނުގެ ރައްޔިތުންނަށް ކުރިމަތިކުރުވަމުން ގެންދާ އަނިޔާއިން އެ މުސްލިމު އަޚުންނާ އުޚުތުން ސަލާމަތްކޮށްދިނުމަށް އެދި ދުއާ ކުރުމަށް ވަނީ އެދިވަޑައިގެންފަ އެވެ.