ރާއްޖޭގެ ތަރައްގީ އާއި ކުރިއެރުމަށް ދިމާވެފައި އޮތް އެންމެ ބޮޑު މައްސަލައަކީ ކޮރަޕްޝަން ކަމަށް ޕްރޮސެކިއުޓަ ޖެނެރަލް ހުސައިން ޝަމީމް ވިދާޅުވެއްޖެއެވެ.
އޭނަގެ ބްލޮގްގައި ގެނެސްދެއްވި ލިޔުމެއްވައި ވިދާޅުވީ ކޮރަޕްޝަންގެ ސަބަބުން އިގުތިސާދީ، އިޖްތިމާއީ އަދި ސިޔާސީ ހަމަޖެހުމާއި ކުރިއެރުމަށް ވެސް އަސަރުކޮށް، ދައުލަތަށް މީހުން ކުރާ އިތުބާރު ވެސް ކުޑަވެފައިވާ ކަމަށެވެ. މީގެ އިތުރުން ޖިނާއީ އަދުލުގެ ނިޒާމު އެކުލެވެނީ ގިނަ އިދާރާތަކެއްގެ މައްޗަށް ނަމަވެސް، މުޅި ނިޒާމު އެކީ މަސައްކަތް ކުރަން ޖެހޭތީ، އެ ދާއިރާގެ އެންމެ ގުނަވަނެއްގައި ކޮރަޕްޝަންގެ ތުހުމަތު އޮތަސް މި މުޅި ނިޒާމަށް ރައްޔިތުންކުރާ އިތުބާރަށް އޭގެ ނުރަނގަޅު އަސަރު ކުރުވާ ޕީޖީ ވިދާޅުވި އެވެ.
ޝަމީމު ވިދާޅުވީ މިކަން ހައްލުކުރެވޭނީ ހުރިހާ އިދާރާއެއް ވަކިން، އަދި ހުރިހާ އިދާރާއަކުން އެއްކޮށް ކޮރަޕްޝަން ނައްތާލުމަށް ހަރުދަނާ މަސައްކަތްތަކެއްކޮށްގެން ކަމަށެވެ. އަދި މަސައްކަތްކުރާކަމާއި، އެމަސައްކަތާ މެދު އިދާރާތަކުން ސީރިއަސްކަން ރައްޔިތުންނަށް ފެނި، އިހުސާސް ކުރެވިގެން ކަމަށް ވެސް ވިދާޅުވި އެވެ.
ޝަމީމު ވިދާޅުވީ ކޮރަޕްޝަން ނައްތާލުމަށް ޕީޖީ އޮފީހުގައި ތިން ބާވަތެއްގެ މަސައްކަތެއް ކުރެވެމުން އަންނަ ކަމަށެވެ. އޢގެ ތެރެއިން ފުރަތަމަ ކަމަކީ، އޮފީހުގެ މަސައްކަތްތައް މީހުންނަށް ބަރޯސާ ނުވެ، ނިޒާމުތަކަކަށް ބަރޯސާވާ އުޞޫލަކަށް ރުކުރުވައިލުމެވެ. އޮފީހުގެ ކޮންމެ ނިންމުމަކީ ވެސް ލިޔެފައި ހުރި އުޞޫލުތަކަކާއި އެސްއޯޕީތަކެއްގެ މައްޗަށް، މަދުވެގެން ތިން މީހެއްގެ ބައިވެރިވުން ހިމެނިގެން ނިންމާ ނިންމުމަކަށް ހެދުމެވެ.
ދެވަނަ ކަމަކީ ކޮންމެ މަސައްކަތެއް ކުރާ މީހަކު ވެސް، އަހަރަކު އެއްފަހަރު ބަދަލުވުމެވެ. މަސްތުވާތަކެތީގެ މައްސަލަތަކުގައި މަސައްކަތްކުރާ ޕްރޮސިކިއުޓަރު، ޖެހިބގެން އަންނަ އަހަރު ޖިންސީ ކުށުގެ މައްސަލަތަކުގައި މަސައްކަތްކުރަން ޖެހިދާނެ އެވެ. މީގެ ބޭނުމަކީ ކޮރަޕްޓް ނެޓްވަރކެއް އުފެދުމަށް ފުރުޞަތުވެސް ނުދިނުމެވެ.
އަދި ތިން ވަނަ ނިޒާމަކީ، މަޢުލޫމާތު ހާމަކުރުމެވެ. ޕީޖީ އޮފީހުގެ ފަލްސަފާއަކީ، ކޮންމެ ކަމެއްގެ އަޞްލަކީވެސް ހާމަކުރުންކަމެވެ. އެހެން ގޮތަކަށް ޤާނޫނުގައި ނުވަތަ މައްސަލައެއްގައި އަނިޔާ ލިބުނު މީހެއްގެ ޚާއްޞަ މަޞްލަޙަތެއް ނެތްނަމަ، ހުރިހާ މަޢުލޫމާތެއް ޢާންމު ކުރުމެވެ.
ޖަވާބުދާރީކުރުވަން ފުރުޞަތު ދިނުމެވެ. މަޢުލޫމާތު ޢާންމުނުކޮށް، ޖަވާބުދާރީކުރުވުމަކީ ކުރެވޭނެ ކަމެއް ނޫނެވެ.
"ޕީޖީ އޮފީހުގައި އޮތީ، ނިޒާމުތަކަށް ބަރޯސާވާ ގޮތަށް މަސައްކަތް ބައްޓަންކޮށްފައި. ކޮރަޕްޓް ނެޓްވަކްތައް ނައްތާލައި، މަޢުލޫމާތު ޢާންމުކުރުމުގެ މާޙައުލުގެ ތެރޭގައި ކޮރަޕްޝަނަކަށް ދިރިއެއް ނޯވެވޭނެ." ޝަމީމު ވިދާޅުވި އެވެ.