ޖިނާއީ ކުށްތަކުގެ ޖޫރިމަނާ ނުދައްކާ ނަމަ ޖަލު އަދަބަށް ބަދަލުކޮ ށްދޭން ދަށު ކޯޓުގައި އެދެން ފަށާފައިވާ ކަމަށް ޕްރޮސެކިއުޓާ ޖެނެރަލް (ޕީޖީ) އޮފީހުން ބުނެފި އެވެ.
އެ އޮފީހުގެ ވެބްސައިޓުގައި އާންމުކުރި ލިޔުމެއްގައި ބުނީ މޯލްޑިވްސް އިންލެންޑް ރެވެނިއު އޮތޯރިޓީ (މީރާ) އިން ދޭ މައުލޫމާތަށް ބިނާ ކޮށް ޖޫރިމަނާ ފައިސާ ނުދައްކާ މީހުންގެ އަދަބު ޖަލު އަދަބަކަށް ބަދަލުކޮށް ދިނުމަށް ދަށު ކޯޓުގައި އެދެން ފަށާފައިވާ ކަމަށެވެ. އެގޮތުން ހުކުމާ އެއްގޮތަށް ޖޫރިމަނާ ނުދައްކާކަން މީރާ އިން އަންގާތާ 30 ދުވަހުގެ ތެރޭގައި، އެ މީހާގެ ޖޫރިމަނާ އަދަބު ޖަލު އަދަބަކަށް ބަދަލުކުރަން އެދި ހުށަހެޅޭނެ ކަމަށް ޕީޖީ އޮފީހުން ބުންޏެވެ.
އެހެންވެ މީގެ ފަހުން ޖޫރިމަނާ ފައިސާ ނުދައްކާ ނަމަ، ކުށުގެ އަދަބު ޖަލު އަދަބަށް ބަދަލުކުރެވޭނެ ކަމަށާއި ސަބަބަކީ ޖިނާއީ ކުށުގެ އަސްލު އަދަބަކީ ވެސް ޖަލަށްލުން ކަމަށްވާތީ ޕީޖީ އޮފީހުން ބުންޏެވެ.
އެ އޮފީހުން ބުނީ ޖޫރިމަނާ އަދަބެއް ކޯޓުން ކަނޑައަޅަނީ ޖޫރިމަނާ ފައިސާ ދެއްކޭނެ ވަޞީލަތް ހުރިކަން ކޯޓުން ކަށަވަރުކުރުމަށް ފަހު ކަމަށެވެ. އެހެންވެ ޖިނާއީ ކުށުގެ އަދަބުގެ ގޮތުގައި ކަނޑައެޅޭ ޖޫރިމަނާ ފައިސާ ނުދެއްކުމަށް ދެއްކޭނެ ޙުއްޖަތެއް ނޯންނާނެ ކަމަށް ވެސް ބުންޏެވެ. އަދި ހުކުމާ އެއްގޮތަށް ޖޫރިމަނާ ނުދެއްކުމުގެ ނަތީޖާއަކަށް ވަނީ އެ މީހަކު ކުރި ކުށަށް އަދަބު ނުލިބުންކަން ޕީޖީ އޮފީހުން ފާހަގަކުރި އެވެ.
އަދި އެކަމަށް އިޝާރާތްކޮށް ޕީޖީ އޮފީހުން ބުނީ ޤާނޫނުލްޢުޤޫބާތުން ދޭ ލުއި ނަހަމަ ގޮތުގައި ބައެއް މީހުން ބޭނުންކުރާ ކަމަށެވެ.