ރާއްޖެއިން ބޭރުގައި ކިޔަވާ ދަރިވަރުންނަށް އިއްޔެއާ ހަމައަށް 12 މިލިއަން ރުފިޔާއަށްވާ ޑޮލަރު ދޫކޮށްފައިވާ ކަމަށް ބާރަށު ދާއިރާގެ މެންބަރު އިބްރާހިމް ޝުޖާއު ވިދާޅުވެއްޖެއެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި ވާހަކަ ދައްކަވަމުން ޝުޖާއު ވަނީ މިއަދުގެ ޖަލްސާއަށް އެމްޑީޕީން ކުއްލި މައްސަލައެއް ހުށަހެޅިކަން ފާހަގަކުރައްވާފައެވެ. މަޖިލީހަށް ކުއްލި މައްސަލަ ހުށަހެޅީ އެމްޑީޕީގެ ޕާލިމެންޓަރީ ގްރޫޕުގެ ލީޑަރު ހިތަދޫ ދެކުނު ދާއިރާގެ މެންބަރު އިބްރާހީމް ނާޒިލެވެ. ޕީއެންސީ ސުޕަމެޖޯރިޓީ މަޖިލީހުން ވަނީ މި ކުއްލި މައްސަލަ ބަލައިނުގަނެ ބޭރު ކޮށްލާފައެވެ.
މަޖިލީހުގައި ވާހަކަ ދައްކަވަމުން ޝުޖާއު ވިދާޅުވީ އެބޭފުޅުންގެ ދާއިރާތަކަށް ނިސްބަތްވާ ބޭފުޅުންގެ ތެރެއިން ރާއްޖެއިން ބޭރުގައި ކިޔަވާ ކުދިންގެ ބެލެނިވެރިންގެ ފޯނު ކޯލުތައް އެބޭފުޅުންނަށްވެސް ލިބޭ ކަމަށާއި އަދި އެ ބެލެނިވެރިންނަށް އުފާވެރި ޖަވާބުތައް ދެމުން ގެންދާ ކަމަށެވެ.
"އިއްޔެއާ ހަމައަށް 12 މިލިއަން ދިވެހި ރުފިޔާގެ ޑޮލަރު ކިޔަވާ ކުދިންނަށް މި ސަރުކާރުން ފޮނުވައިފި، ޑޮލަރުން ފޮނުވީ. ބާކީހުރި ފައިސާކޮޅު މިއަދު އެބަ ދޭ. އެހެންމަ މިތަނަށް ނާޗަރަންގީ ކުޅެން ނޫން ކޮންކަމަކުތޯ މިއުޅެނީ ކުއްލި މައްސަލަތައް ގެނެސްގެން." ޝުޖާއު ވިދާޅުވިއެވެ.
ޝުޖާއު ވިދާޅުވީ ދިރާސާ ނުކޮށް ކުއްލި މައްސަލަތައް މަޖިލީހަށް ގެނައުމުން އެނގެނީ އެ މެންބަރުންނަށް ގައުމުގެ ހާލަތު ވަޒަންކުރަން ނޭންގޭ މިންވަރު ކަމަށެވެ.
ވާދަވެރި ސިޔާސީ ފަރާތްތަކުގެ ޒިންމާއަކީ ހަމައެކަނި މަޖިލީހަށް ކުއްލި މައްސަލަ ގެނައުން ނޫންކަން ފާހަގަކޮށް ޝުޖާއު ވިދާޅުވީ އެބޭފުޅުންވެސް މިސަރުކާރުގެ ވަޒީރުންނަށް ގުޅުއްވުމުން ފޯނުވެސް ނަގާނެ ކަމަށާއި އަދި ޖަވާބުވެސް ދެއްވާނެ ކަމަށެވެ.
އެމްޑީޕީގެ އަސްލު ސިފައެއްގެ ގޮތުގައި ގަބޫލުކުރެވެނީ އޮޅުވާލުން ކަމަށްވެސް ޝުޖާއު ތުހުމަތު ކުރެއްވިއެވެ.