ސަރުކާރުގެ އެކި އިދާރާތަކަށް އަދި ސަރުކާރު ހިއްސާވާ ކުންފުނިތަކަށް ސިޔާސީ މުވައްޒަފުން ނެގުން ހުއްޓާލައި، އާދައިގެ ވަޒީފާތަކުގައިތިބި މުވައްޒަފުން ވަކިކުރާތީ އެކަން ހުއްޓުވުމަށް ގޮވާލާ ހުށަހެޅި ކުއްލި މައްސަލަ މަޖިލީހަށް ބަލައިނުގަނެ ބޭރުކޮށްލައިފިއެވެ.
މި ކުއްލި މައްސަލަ މަޖިލީހަށް ހުށަހަޅާފައިވަނީ ކެންދޫ ދާއިރާގެ މެންބަރު މައުރޫފް ޛާކިރުއެވެ. ކުއްލި މައްސަލަ ބަލައިގަތުމަށް ފެންނަ ކަމަށް ވޯޓު ދީފައިވަނީ 12 މެންބަރުންނެވެ. އަދި މި ކުއްލި މައްސަލަ ބަލައިގަތުމާ ދެކޮޅަށް ވޯޓު ދެއްވާފައިވަނީ 57 މެންބަރުންނެވެ.
ސިޔާސީ ގިނަ މަގާމުތަކާއި ސަރުކާރު ހިއްސާވާ ކުންފުނިތަކަށް މުވައްޒަފުން އިތުރުކޮށް، ސަރުކާރު ހިއްސާވާ ކުންފުނިތަކުގެ އާދައިގެ ވަޒީފާތަކުގައިތިބި މުވައްޒަފުން ވަކިކުރާތީ އެކަން ހުއްޓުވުމަށް ގޮވާލާ މައުރޫފް ހުށަހެޅި ކުއްލި މައްސަލައިގައި ބުނެފައިވަނީ ސަރުކާރުގެ ރިކަރަންޓް ހަރަދު ކުޑަކުރުމަށް ސިޔާސީ މަގާމުތައް މަދުކުރުމަށް ނިންމާފައިވާކަން ރައީސް ޑރ. މުހައްމަދު މުއިއްޒު ހާމަކުރައްވާފައިވާ ކަމަށެވެ. މި ސަރުކާރުގެ ސިޔާސީ މުވައްޒަފުންގެ އަދަދު 700 އިން ދަށުގައި ހިފެހެއްޓުމަކީ ރައީސް މުއިއްޒުގެ ރިޔާސީ ވައުދެއްކަމަށާއި އެހެންނަމަވެސް އެ އަދަދު 2000 ގައި ހުރިކަމަށް ބައެއް ފަރާތްތަކުން ބުނަމުންދާކަން ކުއްލި މައްސަލައިގައި ފާހަގަކޮށްފައިވެއެވެ.
މައުރޫފް ހުށަހެޅި ކުއްލި މައްސަލައިގައި ބުނެފައިވަނީ ރައީސްއަށް ޤާނޫނުއަސާސީން ލިބިދޭ އިހުތިޔާރުގެ، ބޭނުން ނަހަމަ ގޮތުގައި ހިފަމުންދާ ކަމަށާއި، ބޮޑެތި މުސާރައިގައި ސިޔާސީ މަގާމުތަކަށް ގިނަ ބަޔަކު ނަގަމުންދާ ކަމަށެވެ. މައުލޫމާތު ހޯދާ ލިބިގަތުމުގެ ހައްގަކީ ޤާނޫނުއަސާސީން ލިބޭ ހައްޤަކަށްވާއިރު އަދި ސަރުކާރު ޖަވާބުދާރީ ކުރުމަކީ މަޖިލީހުގެ ދުސްތޫރީ ވާޖިބަކަށް ވާއިރު، ސިޔާސީ މަގާމުތައް އިތުރުކުރާތީ، ސިޔާސީ މުވައްޒަފުންގެ އަދަދާއި މުސާރަ ސާފުކުރުމަށް ފިނޭންސް މިނިސްޓްރީގައި މާލިއްޔަތު ކޮމިޓީން އެދުމުން އެކަމަށް އިންކާރުކޮށްފައިވާ ކަމަށްވެސް ކުއްލި މައްސަލައިގައި ބުނެފައިވެއެވެ.
މީގެއިތުރުން ކުއްލި މައްސަލައިގައި ވަނީ ފޭދު ދާއިރާގެ ކުރީގެ މެންބަރު މުހައްމަދު ނިހާދު ނުހަނު ފަހުން ޓޫރިޒަމް މިނިސްޓްރީގެ ސްޓޭޓް މިނސްޓަރުކަމަށް އައްޔަނުކޮށްފައިވާކަން ފާހަގަކޮށްފައެވެ. އަދި އެ މަގާމުގެ މުސާރައަކީ 43500 ރުފިޔާ ކަމަށް ބުނެފައިވެއެވެ. އަދި އާރްޑީސީގެ ގިނަ މުވައްޒަފުންތަކެއް މަގާމުން ވަކިކޮށް ޖުލައި 4 ގައި މެމޯ ފޮނުވާފައިވާއިރު ހަމަ އެދުވަހު، 35،000 ރުފިޔާގެ މުސާރައެއްގައި އެކުންފުންޏަށް 2 ކޮންސަލްޓެންޓުން ނަގާފައިވާކަމަށް ކުއްލި މައްސަލައިގައި ބުނެފައިވެއެވެ.
"ސަރުކާރުގެ ހަރަދު ކުޑަކުރުމުގެ ސިޔާސަތު ތަންފީޒު ކުރަމުންދަނީ ނުވަތަ ހަރަދު ކުޑަކުރުމުގެ ނަމުގައި ހިންގާ މިޖަރީމާ އަމާޒުކުރައްވަނީ ހަމައެކަނި އާދައިގެ ވަޒީފާތައް އަދާކުރަމުންދާ ދެރަ ނިކަމެތި އާދައިގެ ރައްޔިތު މީހާއަށެވެ." ކުއްލި މައްސަލައިގައި ބުނެފައިވެއެވެ.
މައުރޫފް ހުށަހެޅި ކުއްލި މައްސަލައިގައި ވަނީ ސަރުކާރުގެ ވަޒީފާގައި އުޅޭ އެއްވެސް މީހަކު ވަކިނުކުރާނެ ކަމަށް ވައުދުވެފައިވާކަން ފާހަގަކޮށް، އެ ވައުދާ ހިލާފަށް ފާއިތުވި 2 މަހު ސަރުކާރު ކުންފުނިތަކުގެ އާދައިގެ ގިނަ މުވައްޒަފުންތަކެއް ވަޒީފާއިން ވަކިކޮށްފައިވާކަމަށް ބުނެފައެވެ. އެގޮތުން ކޫއްޑޫގައި މަސައްކަތްކުރާ މިފްކޯގެ އެތަކެއް މުވައްޒަފުން މިދިޔަ ހަފުތާގައިވެސް ވަޒީފާއިން ވަކިކޮށްފައިވާކަމަށް ބުނެފައިވެއެވެ.
އެހެންކަމުން ސިޔާސީ މަގާމުތަކަށް މީހުން ނެގުން ހުއްޓުމަކަށްގެނެސް، އާދައިގެ މަގާމުތަކުގައި ވަޒީފާ އަދާކުރާ މުވައްޒަފުން ވަޒީފާތަކުން ވަކިކުރުން ހުއްޓާލުމަށް ގޮވާލާ އަދި މިހާތަނަށް ވަކިކުރި ފަރާތްތަކުގެ ވަޒީފާތައް އިޔާދަކުރުމަށް ކުއްލި މައްސަލައިގައި ގޮވާލާފައިވެއެވެ.